2005年小弟大事回顧

今日就係2005年最後一個工作日, 係時候做番D回顧 1. 轉工 今年轉左兩次工, 兩次其實都有D唔捨得, 兩次都係因為搵到另一份先至走, R 仔走, 係因為想轉行, 搵到新工, 咪走囉.., 中間抖都無抖過.. SCB 走, 係因為始終個環境實在唔理想, 雖然同事們好好玩, 我亦學到唔少野, 但係又係搵到, 咁咪又走囉.., 中間亦係無抖過... 至於而家, 我重覆一次, So far 真係 okay 架.., 未會走住既 : ) 不過..., 真係有D想抖下~ 2. 爺爺 希望爺爺在遙遠既地方生活愉快! 3. 外匯 今年嚮自己投資上有D突破, 由初初只係接觸股票, 到今年10月開始玩/留意埋外匯, 需知道股匯悉悉相關, 兩樣都留意實在係好有幫助 4. HKSI + IIQE + MPF 銀行基本試黎講, 應該暫時都叫全部攪掂, 今年內KO埋 HKSI 同 MPF, 正式可以欏哂所有既牌, 希望對我既發展有幫助! 至於CFA, 今年亦都報左 Level 2 明年六月考, 希望成功! 5. 自住 今年七月我開始自己一個人住~ 除左自己洗衫涼衫熨衫吸塵拖地抹窗換床單等等等等要自己做, 有時仲會有少少悶, 或者自己食飯.. 不過過左咁耐已經習慣左~ so far 亦係幾 ok 6. 興趣 受到 F8 朋友既感染, 今年開始學埋Bowling, 由開頭打直碌仲要成日落坑又唔過百, 到而家玩落西仲穩定番D, 個感覺都唔錯, 黎緊想練下篤波添~ 呢D野都應該要識玩下, 哈~ 7. 台灣之旅 同F8兄弟到台北一遊, 實在開心無比, 箇中快樂, 實屬難忘~ 希望再有下一次~ 哈

開始工作...

番左兩個幾月工, 到十二月尾, 開始慢慢知道自己份工個目標係點樣, 最主要係因為終於知道跑係跑D乜野既數...亦都正式開始工作~ 老實講, 之前兩個幾月真係日日都漫無目的, 每日都係上網睇野, 白逗人工.. 都唔知係咪大公司既Planning就係咁差...., 真係好鬼waste resources.... Anyway, 而家知道左有數要跑, 會辛苦D, 但係總好過無目的咁做野... 我.., 其實並唔係一個咁懶既人黎架 : )

有幾長~~~~~~???

個個都覺得我呢份工做得唔長, 甚至攪到我自己都係咁諗...?? 其實, 咁耐以黎我番左四份工..... 第一份唔好提啦, 人工低微+Commission難欏, 做左兩個星期咁上下.., Sars後難搵工, 實在不值一提 第二份Ricoh, 其實都OK架, 我都叫做做左20個月有多, 算係咁啦...因為想轉行, 所以先走 第三份SCB, 叫做踏足銀行界, 可惜工作性質同埋管理層既鉅變, 令到我地全部人都好想走...結果嚮我搵到另一份既情況底下, 即走~ 第四份HASE, 叫做做番D Relationship management既野, 其實so far都唔錯呀, 雖然都仲有留意有無新既工, 但係至少到而家都未再Send信.., 應該, 都可以留耐D既~~ 其實so far..., OK呀 ~~~

高手....真係高手

早幾日仲講緊彤叔為左擊退TCI即時做決定去配股攤薄, 雖然出手之快令人敬佩, 但少不免影嚮原定計劃.., 誰不知原來一早已經留有後著... 擊退TCI後, 配股被證監會調查, 發現配股涉及周大福關聯人事, 決定放棄認購, 促使配股額大幅減少, 以一招虛張聲勢擊退TCI...真係高手中有高手... 可惜既係呢招雖然贏得清脆利落, 但係Corporate Governance 同透明度就真係受到嚴重影響..., 孰好孰壞..真係不得而知... ------------------------------------------------------------------------- 新世界（００１７）成功擊退ＴＣＩ，配股規模縮減約６２％ 新世界發展（００１７）大股東鄭裕彤跟「兒童基金」（Ｔｈｅ　Ｃｈｉｌｄｒｅｎ’ｓＩｎｖｅｓｔｍｅｎｔ　Ｆｕｎｄ　Ｍａｎａｇｅｍｅｎｔ，簡稱ＴＣＩ）的角力峰迴路轉。當ＴＣＩ大幅拋售新世界股份後，新世界配股行動突然大幅縮減規模，由配售２﹒８億新股減至１﹒０７億股，集資額由３２﹒２０億元減至１２﹒３１億元，減幅達６１﹒８％。鄭裕彤成功擊退ＴＣＩ後，又減低攤薄效應，贏取「漂亮」一仗。 知情市場人士透露，由於認購新世界新股的人士，部分與新世界及大股東周大福企業有業務關係，其獨立第３者的身份受證監會質疑，因而決定放棄認購新股。新世界的通告指，是次配售中，只有一名承配人被裁定一致行動人士，涉及的股份為１﹒７４億股，單就此人承接的總金額就達到２０億元。 接近新世界人士抱怨，受證監會阻撓，新世界未能全數配售股份，不但令集資額大大減少，更讓部分承諾認購新股的人士甩身。《香港經濟日報》

地鐵的股東要蝕桌了

世貿會議曲終人散, 整個過程對灣仔銅鑼灣的商戶生意上起了很大的影響, 有商戶更表示整個星期也做不了生意...... 特首為左 "補償" 呢兩區既商戶, 實施幾項措施務求令商戶 "賺" 回世貿會議時的損失... 其他的建議作法不說, 只拿 "乘MTR於25/12及26/12兩日在灣仔及銅鑼灣區落車可減免$2車費" 來說... 對於地鐵股東..., 公平嗎? 眾所周知灣仔銅鑼灣係港島區其中一個核心, 交通繁忙, 地鐵每日人流量多不勝數, 星期六日不在講, 大時大節公眾假期更甚..地鐵於香港某些商場設立 "優惠站" , 凡乘客到優惠站 "DO" 八達通可獲$2折扣, 此舉可算是商業決定, 地鐵及商場可達至雙贏..互相增加人流.. 但係25, 26號聖誕佳節, 叫地鐵減價, 我實在睇唔到站在地鐵股東立場上有咩得著.., 坦白講, 大時大節你要去灣仔銅鑼灣都唔會坐巴士, 前世未塞過咩.. 即係話坐地鐵係 "硬食" 既方法.., 小弟經濟學到中五, 都明白demand越大, $$$ 應該上升先得.., 聖誕假日唔加價不特止, 反過來要減價?? 我真係諗唔通.. 再加上, 個少少 $2 價惠會對巿民購買慾增加咩? 平$2 俾佢地坐叮叮呀? 真係唔明點解要66號股東損失兩日公司賺錢既機會, 去補償灣仔銅鑼灣區商舖的損失... 我明白佢地損失係慘.., 但係無理由要咁樣去轉移, 而且亦唔見得係轉移得到..真係吹脹 (申報: 本人並非66的股東~)

點夠你玩...

先補貼安排農民來港示威, 及後請得大長今來港安撫... 韓國政府啊..., 點同你玩呀?? 李 英 愛 周 五 襲 港 安 撫 港 人 (星島日報報道) 反世貿韓農剛退下火線，韓流又再襲港﹗「萬人迷」李英愛將於本周五，聯同韓國人氣偶像安七炫旋風訪港，為無線《冬日群星演唱會》擔任嘉賓，明年無線還將主辦4個演唱會以開拓「水源」﹗　　 無線《冬日群星音樂會》將於本月23日假將軍澳電視城舉行，有份演出歌星包括無線「契仔」李克勤以及楊千嬅、何韻詩、古巨基和關淑怡等，韓國歌星安七炫將以表演嘉賓身分載歌載舞。不過，聲稱不懂唱歌的「萬人迷」李英愛則只會以嘉賓身分代表贊助商移交2萬5千美元支票給聯合國兒童基金會親善大使黎明﹗　　 2005/12/20

群眾常犯十大錯誤

節錄自二零零五年十二月十五日, 信報 - 投資者日記 by 曹仁超

群眾常犯十大錯誤：

1. 聽信謠傳而信分析。
2. 明明唔知道卻一味靠估。
3. 追隨群眾成為其中一分子。
4. 冇耐性。
5. 貪念太多，智慧太少。
6. 利用太少孖展資金去炒賣。
7. 明知睇錯唔肯止蝕。
8. 永遠唔肯離開巿場（磨爛蓆）。
9. 止賺唔止蝕。
10. 過分相信『大戶』眼光。

理財

近日刻意改善自己既理財習慣, 每日都會記得用過既錢同用左嚮邊度, 做番一個Record, 記低究竟自己D錢洗左去邊度.. 希望可以維持耐D!!~

反應快!

所說非其他人, 乃說曾經和他是同一個集團股東既彤叔.. 那邊廂公仔箱報導新世界集團被近日熱烘烘的孩子基金大手入股, 這邊廂彤叔來一個折讓配股, 你有你高追持貨, 我有我平買攤薄... 新世界不嬲被譽為古惑地產收租股之一 (皆因其集團配售之頻密), 這次遇上國際大鱷, 經過詳細分析既孩子基金必定唔會輕易放棄, 看來勢必有場好戲睇~... 小弟對財技一無所知, 但對這場大戰, 必定拭目以待~ (期待方兄孔兄對這場大戰作出分析....)

考試生活又再來了...

又要開始勤力番~

曼聯出局了...

費SIR...祝你好運...

小學同學聚會

久違了既小學同學琴日黎左個聚會, 嚮尖咀某上樓Cafe叫做開左個小Party 開頭真係有D擔心去到會唔會做乜唔知搞乜, 會有Dead Air, 但係結果比我想像中好好多, 哈~ 真係有好多同學唔認得, 名就一定知道, 但係Match唔番落個樣度, 哈~~ 識左十幾年結果又係要黎一個自我介紹.., 真係諷刺~ 一班40人有成23人黎左, 真係估唔到咁多..諗諗下, 93年畢業後有D真係到今日先再見番... 有D..直頭係小一 (87年) 識到而家...真係好鬼正~ 大家講番以前好多既白痴低B野.. 預備鐘, 媽咪麵, 運動室, 木工堂, 風紀隊長, 跳飛機, 拍公仔紙, 摺青蛙, 猜皇帝....實在不能盡錄...哈哈哈~ 十幾年既回憶, 真係嚮一晚之間勾起哂出黎.. 好幾位同學都話我高左好多, 又話我咁多年個樣都無變過...哈, 係開心定唔開心呢... 最正係欏番當年張畢業相出黎睇, 嘩...當時每個人個樣都好搞笑.., 見番D老師既面孔, 又覺得好親切.. 呢一班, 真係比我想像中Happy, 可能因為真係太耐無見而且又有咁多人出席.. 真係無得頂, 冀待下次既聚會~~

弊傢伙

又想挑戰下自己添.... 點算好點算好... Citibank.......

番啅成功

順利Pass HKSI Paper 1~ 恭喜恭喜~

呢期既人生道理...

呢排多左d 人生道理掛嚮口邊.. 1. 最緊要知道個世界發生緊咩事 2. 只要明白個遊戲點玩就可以了 問朋友我係咪老得太快, 無左個童年... 反而俾佢話我應該再老得快D...哈~ 近排發現自己學左好多野, 感覺不錯~ 總之, 唔好用自己個角度去諗野!~

大閘蟹

雖然遲左少少, 但係都好好食, 哈~

ICQ 有古惑 ??

如果仲係用緊ICQ2003b既你地, 有無發覺呢排開親都好快Hang? 用佢新既ICQ5又係一樣係咁.. 不論重裝, Fix Database 我都試過, 問題都係無改善.. 究竟...發生咩事?? 古惑古惑.... 有無人可以講我知點解?

旺角....

唉....得出最後結果... 我都係要離開我最愛既觀塘, 以後番工番旺角... 好唔捨得5:30放工5:40番到入屋企門口既日子呀!!!!!

收視過千

7月尾引入BlogPatrol去計算呢度既人流量...~ 嘩哈哈, 不足4個月終於突破1000人大關!!~ 即係話..., 每個月大約有250人次..., 每日..都有8-9個喎..呵~ 究竟你地係邊幾個?

幻彩詠香江

--------------------------------- [從明報節錄] 「幻彩詠香江」燈光音樂匯演被列入健力士世界紀錄，成為全球「最大型燈光音樂匯演」。 這項紀錄是根據目前港島二十幢建築物於每晚在同一時段，以互動燈光及音樂效果，展示出維多利亞港夜景的動感而評估的。 今晚同時亦會舉行「幻彩詠香江」第二期政府建築物（香港文化中心、香港藝術館和香港體育館）的亮燈儀式。這三幢建築物已完成燈光裝置，並將於下月參與第二期的匯演。「幻彩詠香江」第二期將會涵蓋超過三十幢維港兩岸的建築物。 --------------------------------- 好老實....我仲未認真睇過.., 只係之前嚮灣仔番工時夜走會見到少少... 遲D第二期.., 我決定認真地去睇一次!~ 有人陪我嗎??

窩輪...

好想寫下我對窩輪既睇法... 今日無意中聽新城財經台聽到高盛亦跟隨其他同業推出窩輪, 連計之前滙豐也推出窩輪..., 實在令我對呢個Topic好有興趣... 又係無意中睇到段新聞, 見到高盛同匯豐分別從法興同麥格理(兩間大窩輪商)挖角其舊有主持人過檔(李頌慈及雷裕武)以發展其衍生工具巿場, 可見兩間大銀行對窩輪發行呢行生意非常有興趣, 亦非常肯投放資源... 終歸原因....就係呢舊肥豬肉實在實在太大..., 不難聽見散戶在窩輪巿場中損手爛腳, 但眾散戶仍樂於在此賭場上與莊家對賭...真係唔知佢地諗乜... 考埋HKSI搵多D Information 寫下又發表下先...

搞Gathering..

發現我都幾鐘意攪Gathering..., 聽晚又會係一個由我攪既聚會.. 02年大O既輔聚... 約得雖然都幾急.., 但係都有幾多人黎到.. 有好多都超過兩年無見.. 希望聽晚會精采D ~

我愛曼聯!!!!!

2005年11月6日 曼聯主場迎戰車路士, 結果以1-0 獲勝, 並終止車路士40場不敗紀錄... 想當年終止阿仙奴連勝紀錄的亦是曼聯... 此乃為何曼聯在球壇有如此地位!! 不過..., 好難得呢場波, 阿記同利記既球迷都有給予支持.., 好明顯都係想個聯賽好睇D, 同埋等呀摩生唔好咁Q串!!!

決心...

番啅 HKSI Paper 1 ... 加油!

第六感...

呢排硬係形住形住 06, 07年香港, 甚至全球會有D唔好既野發生... 有D擔心....

破解 IE 排尾二之迷...

「一齊既迷底已經全部解開了!」 話說今日同一班IE朋友聚餐, 席間有位朋友提及我地一位同學最近工作狀況, 以下為原句摘錄： 「佢去左"吝"色園做TA」..... 眾朋友即時大叫 「係"嗇色園"呀!!!」 朋友A, 多謝你為今晚帶來無限歡笑!

悠閒的早餐~~

由於Cut左有線, 但係又想睇波, 結果番左沙田屋企睇, 順便過埋夜.. 賽果唔好再提..., 絕對唔係重點, 但係第二朝起身, 落左去附近間餐廳享受左一個好悠閒既早餐... 今朝天氣好好, 有陽光, 少少涼, 氣溫絕對適中, 我地專登唔揀室內坐, 出左出面, 坐嚮太陽傘下享受下日光浴, 早餐食乜野唔重要, 好唔好味都唔重要..., 最lum既係享受住一杯茶餐廳奶茶, 加一份今日既報紙, 享受住微涼既天氣配合太陽既溫暖, 仲有同屋企人既閒聊~ 呢種感覺真係無限寫意... 有時我好恨可以好似其他人咁, 將每一日既Schedule Pack 到密一密, 謂善用人生云云, 不過, 有時靜下黎, 享受一下四周環境, 與家人閒談, 呢種生活我仲prefer... 可能我本身就係一個懶人既關係啦....哈哈

自言自語

同一個新寫Blog既朋友傾過, 佢話佢好似自言自語般地寫Blog, 覺得有點兒奇怪... 其實開頭我寫Blog既心態係似寫日記咁 (於pchome.tw的白日夢工場 version 1.0), 之後才慢慢寫D身邊發生既野, 世界大事, 無聊事或者一D感想, 雖然我都希望有人會俾Comment我, 但係其實有時我都會自己睇番自己寫既野, 覺得幾得意, 諗番自己當時點解會咁寫.... 我非常同意博客文化其實希望增加每個讀者既交流, 之前專登開左個Blogpatrol去記住我呢個Blog既流量, 都係想睇下其實我寫既野有無人睇.... 咁多位~~ 請不要吝嗇你地的意見, 隨便給每一位Blogger寫既野一D Comment吧 : )

恭喜車仔四冠夢碎

查爾頓你好野!!

再矛盾

http://billylo.blogspot.com/2005/07/blog-post_29.html 之前曾經寫過中華電力於繳費單附有宣傳單張叫人環保D, 慳D電... 今日睇電視, 見到中華電力賣廣告, 聲稱中華電力燃亮每一個人云云.... 我心諗.., 聞說九龍及新界所有人要用電都係唯有搵你, 究竟你想賣廣告係為左乜呢 (請原諒我無讀過 Marketing, 我真係唔明 monopoly 點解要 build coporate image), 用家有得選擇嗎?? 你賣左廣告, 會有其他地方既人走黎搵你欏電用? 你唔賣廣告, 九龍新界既用家會離你而去?? R哂頭..., 黃金時間嚮無記賣廣告對於中電黎講可能未必係貴, 但係..., 究竟目的在那??? 麻煩知道既人請告知.., 萬分感謝!

搵工??

上一份工..., 我番左唔夠一個禮拜已經開始再有搵工.... 呢一份工..., 番左兩個禮拜, 由不嬲習慣日日留意有咩新工到而家連Favorite個folder都搬走埋, 睇都無再睇.... 綜觀呢度既人, 事, 運作等等都應該比之前好...., 不過.., 貪心的我應該不會滿足於此 : )

愛華頓, 你好野!!!

我欣賞你!!

抖夠...

抖埋呢個十月就夠哂皮...黎緊大把試要考... 唔該努力少少, 咪再咁懶!!

考起...

自問自己對理財都有番咁上下年資, 但係竟然俾新同事一句問題考起, 引起我有一丁點的不安... 新同事：「咁你諗住點搵你既第一桶金？」 我：「咁...咁我又真係無認真去諗...」 尷尬..., 不過唔緊要, 呢條問題正好係一次當頭棒喝, 原來我咁耐都只係停留嚮呢一刻要點做, 並無將眼光放遠少少... 好, 黎緊我會Plan下我接住落黎十年既理財計劃, 多謝呢位同事...

Wild Camp

去完番黎, 感覺不錯~~ 都唔知點解去 Wild camp 既 Dinner 仲豐富過我平時既野食...勁激動~ 期待下次再去

說時遲，那是快

這邊箱 Google 跟 Sun 就Openoffice的合作還言猶在耳 , 那邊箱 Yahoo 跟 Microsoft 就Instant Messenger便來一個合作來反擊... 我這個心繫 IT 的 ex-IT人, 實在對這些合作感到興奮, 因為.., 最終得益的必定是用家吧... 期待 IM 巨頭 AOL (ICQ) 的動作.....

是日頭條

1. 神舟六號太空船順利升空 2. 煲呔曾宣讀首次施政報告 3. 恒生指數大跌323點 4. 我又番新工...哈哈

Farewell

多謝各位~~ 玩得好開心... 雖然大家唔係識左好耐, 但係個感覺真係好正, 哈~ 真係有D唔捨得大家~~ 唔知仲有無機會試下個種朝早開完會食早餐, 之後唔做野再食下午茶, 又或者去碌Ling, 夜晚又準時坐 Shuttle 走個種生活... Anyway, 各位努力!

Disneyland VS Ocean Park

個多月內分別到了Disneyland及Ocean Park..., 當中可謂各有千秋.. 但以個人黎講, 還是覺得 Ocean Park比較優勝... 1. 親切感 2. 大小 3. 工作人員 4. 價錢 5. 風境 6. 機動遊戲 7. 紀念品 8. 主題 9. 裝修 有時間再寫...

941 + 331

中國移動收購萬眾 無耐之前才討論過小超人收購星期日呢件新聞, 亦預告過電訊界勢必再有合併收購新聞, 果然, 中國移動宣佈收購萬眾電信, 究竟, 中國移動的目的是什麽? 收購後對自己本身有什麽優勢? 萬眾電信又能為中國移動帶來什麽利益?? 等我睇多D文章再寫...

好刺激....

真係好刺激.... 死火, 我真係驚我開始沉迷另一樣野....

紅軍被強姦了....

http://soccernet.espn.go.com/report?id=186526&cc=4716 2005年10月2日晚上, 英格蘭超級聯賽大戰, 利物浦主場迎戰車路士..... 賽果如下... 我其實只係睇左下半場賽事.., 但實在不得不佩服車路士那種 "擺明屈機" 既踢法, 人所共知既戰術, 搵左右翼爆到你地累哂, 下半場再搵過D人入黎再爆... 由其係當你落後緊局住去攻既時候, 佢地既快速反擊就更見厲害, 實在有點似早兩三年的阿仙奴.., 及早五六年還有碧咸長傳屈機時的曼聯... 究竟今年有邊隊波可以克制車路士?? 期待曼聯VS車路士一仗.......

有Offer啦...

恭喜哂!    
(PS:唔係下面個一份)

火都黎埋..

咁串, 咪攪囉... 我頂!

面試題目

1. In your opinion, which countries and/or sectors are the promising investment in Q4 2005? 2. 油價高企對環球經濟的影響 (原來出面個世界好大.....)

轉載...

家長雜誌 A35 星島日報 2001-02-22 獨家分析 收生成績大比併 還有兩個月全港近四萬名中七學生便要決定大學選科，根據本報獲得最新（2000年）八所院校的收生資料顯示，去年中大醫科及訊息工程學的收生成績竟首次超越港大，成為上述兩科收生成績最佳的大學，令港大「龍頭大哥」的地位受到挑戰。

---

精靈教室 D09 星島日報 2000-06-06 中大訊息工程最搶手 中大的收生成績近兩年沒明顯大分別﹐最高分的五大科目幾乎相同﹐惟高考平均分稍跌。中大的訊息工程學向來出名要求高﹐尤其在資訊科技年代﹐這科定成為高材生必爭之地。至於最低分的學科始終較為「偏門」﹐如宗教﹑藝術﹑人類學﹐出路較窄。成績差又想入大學或可考慮﹐不過﹐這些科目多設面試﹐要求學生有這方面「天分」﹐故難有必勝把握。

---

精靈教室 A11 星島日報 作者名稱不全 1999-10-26 專欄名稱不全 資訊科技及工程﹕近年受重視 中大的訊息工程乃現時唯一專門研究「電腦網絡」及「電訊」的學系。跟其他學系不同﹐此科著重研究和設計﹐故此理論課程亦相應較多。另外中大本年度新設的資訊科技課程亦由訊息工程學系負責﹐可見此系甚受重視。 理大的資訊科技與計算機科學的課程十分相似﹐課程都是教授軟件為主。另外﹐資訊科技系的畢業生雖然沒有「工程師」的銜頭﹐但是由於他們大都可以在第三個學年到各大銀行﹑電腦公司「工讀」一年﹐吸收實際經驗之餘更能賺取下一學年的學費﹐故此亦是一個不俗的選擇。 另外﹐港大亦將於下學年開辦訊息工程課程﹐可見此科仍是被看好的。

無言...

轉Perm

呢D時間搞D咁既野...

幻想......計劃???

九月尾....遞信 十月尾....Last Day 十一月....去旅行 十二月....休息 一月....新一年開始 二月....過埋農曆年開始努力搵工 三月....新生活 成日同自己講要訓練好D自己個EQ..., 不過, 有時真係想俾自己抖下... 成日同自己講凡事嚮好個方面諗..., 不過, 越向好個方面諗就越覺得件事唔好... 喂.., 你會唔會太多藉口俾自己呀??

老細s 之二

之前份工其實係因為開個頭開得好, 老細亦都幾欣賞我... 結果有好多好野都會留番俾我, 亦都同我撐左唔少野... 至於而家呢份.... 個頭無話開得特別好, 成績又唔係最好個D, 但係最正就係最近嚮我Lai左野之後, 連鬧都無鬧, 仲幫我諗埋解決方法, 一次過幫我solve哂D問題... 呢種感覺真係好好...係會撐你個隻既老細... 其實不嬲都覺得老細最緊要係撐自己..., 唔係話有野發生就鬧鬧鬧...或者俾面色你睇.. 唔..., 呢種既做法..., 一定要學習下!

老細s

正式黎講做過兩份工..., 暫時黎睇兩份工都遇上好老細~ 今日比較唔得閒, 遲少少再舉例說明之~ 哈

轉唔到...轉唔到...

激死..., 好有衝動轉去用 Firefox + Thunderbird... 但係...... 硬係覺得 Outlook express D字順眼D.. 硬係覺得開條Address Bar嚮下面用 "GO" 去開IE方便D... 結果?? 用唔夠15mins.., 放多陣都唔用就uninstall左佢 =_= 唉...擺脫唔到Microsoft...

真係慘....

http://hk.news.yahoo.com/050829/10/1g2zw.html 【東方日報專訊】無線於剛過去周日舉行之《兒歌金曲頒獎典禮2005》已圓滿結束，但餘波未了，沈殿霞愛女欣宜(新聞 - 網站 - 圖片)減肥成功後首次於舞台上表演，與無線「新人王」吳卓羲合演一場壓軸歌舞，其中欣宜輕吻吳卓羲面頰一幕，竟然惹來五十四宗投訴，成為今年接獲投訴最多的節目。 廣管局所收到的投訴，直指這幕親吻場面令人不安、未有顧及觀眾感受以及有貶低男性之嫌，而網上亦有不少批評，更有網友在片段中加入刻薄字句，言詞毫不留情，兼且全部針對欣宜，但不知這些投訴者又有否顧及欣宜感受呢？

拜拜...爺爺

不必掛念...

心情沉重..

不想多言... 但, 明知是不能復元的, 仍然用儀器及藥物去維持生命.., 老實說真的有點徒添痛楚.... 及後以藥物麻醉痛楚.., 陷入半昏迷, 確實是減少了痛楚... 但.., 白白躺在床上, 連反應也給不了...為什麽??? 為...為了多陪伴多他一會兒吧... 真是矛盾...

生日快樂!~

又老一年了....哈~ 這兩星期都忙於在醫院出出入入.., 實在沒心情寫網誌... 特別在此感謝祝福過我的你地!!!~ 謝謝~

年紀大...機器壞

真係屎左好多... 星期五同阿Kate Farewell, 放工之前無聊得滯同Kingo去左淘大碌LING..., 因為平, 而且時間尚早, 結果Total 碌左9局.....係每人9局..(當中好彩贏左6局), 嘩.., 結果手手腳腳痛到呢.., 今日星期日仲痛緊, 係肌肉酸痛個隻.., 真係救命.. 夜晚啦, 番左屋企換件衫就去左尖咀唱K飲野~ 一入到去我見到咁多支Chivas都心諗唔對路, 無理佢地即刻欏左D野食同飲定D檸蜜打一打底.., 唱左幾首歌就衝入去同佢地班友仔劈過~~ 好彩我都算訓練有數, 臨場發揮都唔差, 至少都叫做劈LUM左幾條友, 哈哈~, 始終加左綠茶, 難唔到我既, 我地飲開on the rock only架咋嘛, 哈!! 一路玩落去, 本身約左michelle 同 peggy 食野, 點知佢地因為公事繁忙結果都出唔到黎, 11點幾michelle打俾我話想過埋黎唱K, 我當然無問題, 接左佢上黎就一齊玩, 亦都陪佢傾左陣計, 佢都飲到醉哂我就送番佢番屋企先... 及後條死Edward昆我話個Party未完, 攪到我又仆番番去, 點知班友仔個個訓哂, 我唱多一兩首歌都要走, 蝕左..., 番到屋企訓得覺黎都天光...不過Anyway 呢晚都非常Happy, 希望阿Kate繼續生意興隆, 得閒番黎食下飯!! 不過之後第日同F8 黎個8月Gathering..., 唉...身體真係差左好多咁, 個人完全唔想飲酒, 又累又眼訓..., 手手腳腳又仲痛緊..., 唯一有D鼓勵既就係曼聯贏波!! (2:0 作客贏愛華頓), 都叫做有D安慰.., 成晚都唔敢飲酒, (雖然都係飲左少少Glenfiddich), 點知..., 第二朝起身.., 喉嚨痛=_= Oh shit....... 唉, 睇黎係飲得太多 & 太夜訓既關係...

哈, 迷失主題...

死火, 俾人話我講D野同個主題都無關....講講下都唔知我講緊乜.. 車~~~ 咩喎, 咁.., 呢度係俾我亂咁講野架嘛, 哈, 吹咩~ 呵 :)

會考放榜...

聽日又到會考放榜既日子.., 照慣例個天會落一日雨, 以反映污雲蓋頂, 哀聲載渡, 天昏地暗日月無光之心情.., 小弟當年比較好運, 總算不用自己和家人太過擔心, 上年會今年小弟都有表弟經歷會考放榜, 但我個人推測他們的經歷將會各異... 上年經歷的表弟, 為人精明醒目話頭醒尾古靈精怪古古惑惑, 自細沉迷打機玩樂, 全遊戲機機種都有及...做買賣, 無錯, 做買賣, 從網上以不同方式賺錢, 雖然唔係賺得多, 但係個種精神及膽色值得一讚.. 今年經歷的表弟, 為人靜局, 被動, 唔鐘意講野, 但係因為屋企影響關係, 勤力讀書... 結果, 上年的表弟成績平平, 家人擔心前途送了他過美國讀書, 結果書還未讀成便回來香港... 今年的表弟, 我個人預測成績必定有交代, 相信會滿意, 應該原校升讀中六, 繼續寒窗N載... 但係你問我, 出黎社會做野搵食..., 我絕對認為上年的表弟會比較好, 我總係覺得佢有這種 "社會生存"的頭腦, 以我自己既經驗, 要嚮社會生存, 離不開社交手腕及人際網絡.., 書本上既知識係重要, 但係只不過係入券吧..., 技巧? 可以慢慢學番黎.., 但係你如果無社交能力, 讀書幾叻都無用...同事唔會理你, 上司唔會鐘意你, 諗住做生意咩? 無人際網絡點做, 客仔都唔會欣賞你... 我絕對唔會話讀書唔重要, 但係我既結論, 我會覺得嚮讀書之餘, 社交手腕及人際網絡既建立實在非常重要...試下測試下自己網絡有幾強? 1. 同輩中, 你識得幾多種職業既朋友? 2. 同一職業中, 你又識得幾多唔同年紀既朋友? 寫得出嗎? 哈, 自己滿意嗎? 保險界推銷有另一種方式, 就係寫自己身邊100位朋友既名同電話出黎去推銷, 我未試過寫, 亦無去諗.., 如果要我去寫....唔知寫唔寫得出呢~?

呢排又開始睇下D求職網頁...

一部份原因係為自己搵定多一條路.. 另一部份原因係睇下自己有D咩要學, 要識, 要預備, 要裝備... 加油!~

飲得太多了...

呢排因為唔同原因, 飲了不少酒..., 個人黎講始終唔太想因為唔開心而去飲酒, 飲酒, 應該係開心, 要盡慶的!~ 真係想飲番少D..., 可惜, 戒酒....談何容易 =_=

8月1日

一個好既開始, 希望KEEP得住.. 呢排個情緒Frustrate得幾緊要.., 要反省下先!

酒...

琴日真係好想一醉... 雖然飲完係渡過左一個愉快既晚上, 但係第二朝起身... 煩惱仍在, 問題並無解決.. 好想叫自己唔好同人比較, 好想話俾自己知盡左力就得... 但係我做唔到..

流年不利...

今日心情很壞... 不下於兩位友人對我說今年流年不利, 犯太歲云云... 好想說服自己我從來不相信這些說法.. 但, 有點感到吃力... ------------------------ 我同你講, 我...會番黎架!!! 『一瞬間低落 然後我自然又再生 最後塵埃跌定 我便會翻生!!!!』

矛盾...

因為而家自己住, 一切水電煤氣費都要自己搞掂... 今日收到電費單, 因為驚唔記得交拿拿聲SET Ebanking KO左佢... 手痕得滯欏左佢D宣傳單張睇下, 有一欄係講 "能源效益小貼士"... 見到呢度, 真係有D奇怪既感覺., 如果我係中電既股東, 睇到呢欄唔知有咩諗法呢? 我無去確實研究中電利潤既分佈, 但係相信有一大部份都係來自供電收益, 站在股東立場, 管理層絕對應該做一D為股東謀福利既事, 什麽什麽慳電小貼士? 根本就係破壞利潤增長既做法, 純以股東諗, 你地班巿民最好就有咁多用咁多, 出街唔熄燈唔熄冷氣, 買D最唔慳電既電器, 冷氣有咁涷開咁涷, 總之就有咁多電用咁多電, 咁中電就賺得更多, EPS 越高時股價同派息都可以提高~! 但係..... 換著環保人仕角度睇, 宣傳節省用電絕對重要, 大家都明白電力對現今社會重要性, 但係當然係越少越好, 當然佢地未必係中電股東, 唔怕影響利益, 但係為著世界環境及將來著相, 的確又係幾重要...對中電黎講, 又可以樹立番佢地social responsibility, 其實又幾好.. 好啦, 咁問題又黎, 夠竟能源效益小貼士應唔應該再有? 社會責任與及股東利益又應該如何取捨? 或者呢隻 "獲" 仲未爆出黎, 但係真係幾想知如果真係有小股東投訴管理層做出一D損害股東利益既事後果會點....哈...應該有一場好戲睇.. (利益申報:本人並沒持有中電控股之股份)

Eason - 開不了心

(振作)... 曲：伍卓賢 l 詞：林夕 l 編曲:劉志遠 l 監製:Jim Lee 一想起再累也是要做人 我的思緒便繃緊 誰又要大家比我還擔心 胡亂地鼓勵人 一想起往日某段抱憾 不要用笑話迫我暫時興奮 難度怕我一不快便輕生 輪流伴我談心 散心 *不開心就不開心 也別勉強的慰問 但求隨著我的心 灑脫地尊重我的傷感 別要不開心便找開心 去避過我的良心 消化憂鬱後 才令我拾回自信心 一想起戰亂破壞了文明 我怎可以沒有知覺 告訴我幸好這裡沒有飢荒 難度便可快樂 一想起我們有話要講 未曾被聽見便閉幕 猶幸我愛惜這個地方 仍然盛放 repeat* 不開心便找醫生 吃藥吃到不會恨 但求藍調更興奮 迫我大笑情況更傷感 不開心未必不堪 快樂也要找原因 一瞬間低落 然後我自然又再生 最後塵埃跌定 我便會翻生

給所有的朋友

正面D, 積極D, 做每件事之前都俾個目的自己... 你會更加成功! 共勉之~

是時候投入番...

工作上慢慢已經適應了... 亦慢慢了解遊戲規則... 是時候番去我鐘意既野~~ 樓, 股, 匯, 債! 加油!~ 要放番D時間落去, 彌補下我既支出, 哈!!~　

其中一樣陪著大家成長的東西...

Windows.... 呢隻窗真係陪左大家好多年, 由細到大.. 呢隻窗幫左大家好多, 將大家帶進GUI既年代.. 呢隻窗同事亦都俾左好多麻煩大家, 至為人熟識既莫過於藍畫面.. 呢隻窗, 大家對佢又愛又恨, 駭客對佢十分鐘情(因為大把機會俾佢地表演).. 呢隻窗...我除左頭兩隻未用過, 打後個D全部都用過..., 當中仲加插在 Windows NT, 同 Windows Server 2003. 呢隻窗, 又有新Version..., 祝大家好運!~

談談書展

一年一度的書展已經開始了好幾日, 經友人口中得知, 今年書展又多人了..., 誰說香港人並不愛閱讀? 書展裏人山人海, 小弟蛇王於書局打書釘時永遠是人頭擁擁, 香港是文化沙漠?? 麻煩這樣說的人出來解釋下!!! 不過話須說回頭, 且看看小弟以下的感覺.. 1. 香港人是愛趁墟的, 一年一度書展盛事, 有明星嘉賓看不特止, 香港人咁悶, 以行書展作為行街睇戲食飯唱K外既聯宜活動簡直非常恰當~ 2. 香港人是愛書的, 但某程度上是愛"儲"書, 或者用"貪新鮮"去形容, 不說他人, 至少小弟就是這樣, 雖然已經經常叫自己唔好買咁多書, 但係買左番黎而又完全睇哂既, 真係唔知有幾多本.. 再者, 一本書睇一次真係未必明得哂(因為我唔係睇小說), 根本用唔盡書既價值.. 3. 香港人看書, 很多都是走馬看花盲目跟從, 近期興睇某本書便 "仆" 到咁去睇, 或者係香港人要"潮"既心態啦, 生怕蝕底了, 少了一個談論的話題.., 但是, 了解內容或者作者想表達的事又有幾多人? 以文化沙漠一詞形容香港, 從表面上來看好像不成立, 但骨子裏 "有文化" 的人.., 實在不多 (至於我唔認為我係)... 暫時係諗到咁多, 本身寫多左少少有關於香港資訊氾濫既野, 不過好似離左題, 下次再談.

晶晶~~

郭晶晶又贏了, 今次仲係輕鬆以645.54分比隊友吳敏霞的619.05分取得金牌..., 可見她仍然非常有實力~ 至於吳敏霞..., WELL, 不免有點 "既生瑜, 何生亮" 既感覺.., 可惜可惜~ 但是無論如何, 恭喜中國跳水隊!! ----------------------------------- 中國的奧運會冠軍郭晶晶7月22日在蒙特利爾世界游泳錦標賽女子跳水三米板比賽中連奪冠，繼續統治該項目。她以總成績645.54分連續第三次奪得該項目世錦賽冠軍，成為首位在世錦賽同一項目中三次奪冠的女子跳水選手。她在雙人跳比賽中的搭檔吳敏霞以619.05分名列第二，意大利選手卡尼奧托(Tania Cagnotto)獲得第三名。圖為郭晶晶(中)、吳敏霞(左)與卡尼奧托領獎後合影。

男女字典 VS 窈窕熟女

一套係三名索女+一個Gay Man, 一套係四個女角+一個肥佬.... 兩套都係講男歡女愛+少少性愛既劇集... 一套由 Now.com 製作, 一套由 TVB 大電視台製作.. 出來的效果可以爭咁遠..., 今日睇罷窈窕熟女..., 撞你個鬼, 何來窈窕何來熟女... 選角既問題實在太嚴重.., 個人黎講唔係話唔鐘意苑瓊丹, 佢拍皆大歡喜可謂一時佳作, 但係用佢黎講窈窕熟女, 會否缺乏了一點說服力... 再說, 阿叻既所謂搞笑實在也太不好笑了, 嚴格黎講甚至有點討厭的感覺.., 祥仔亦不需要作這一種角色, 不要跟我說這是一個演技的挑戰.., 論搞笑, 我相信祥仔不下於叻哥... 伍詠薇可說是比較突出, 始終她是有條件, 可惜歲月催人吧..., 騰麗明, 由咕嚕咕嚕至陀槍師姐也很有好感, 算是不過不失... 韓君婷, 唉, 過份賣弄沒有的姿色, 實在不願一提... 四位都已經一把年紀, 拍這些形容三十以上女仕們的生活, 基本數據或者適合, 但也請為觀眾的眼睛著想一下好嗎???? 相反來說, 男女字典中, 由李籠怡演剛出社會的女仔, 郭慧演成熟了一點, 事業型的女人, 再加上朱茵演已經非常渴望愛情的女人, Mix and match 起來, 感覺還更好...至少, 她們仨都比較"正"... 最重要還加上杜汶澤這種搞笑好手, 配上天佑及佑楠演有型及戇直的男仔, 出來的化學作用真係比<<窈>>好.. 唉...本來對<<窈>>片都抱有期望, 希望星期日晚上沒有了獎門人還可以笑下, 看來還是要失望了 (提到獎門人, 還認真覺得曾志偉做司儀的能力實在很強, 無線正出現青黃不接的階段, 金牌司儀們(如DODO姐, 肥姐, 志偉, 阿旦等) 的接力棒要交給誰, 還看往後發展)... 窈窕熟女

奇怪...

心入面有好多野想寫.., 但係竟然一隻字都寫唔到出黎? Shit.., 要諗下辦法先得~

峰壽司...

銅鑼灣峰壽司11人疑中毒 嘩~~ 呢間壽司店我之前都去過架, 早期黎講簡直一時無兩, 主店晚晚排隊等位, 六點等到九點先有得食個隻, 後來開了新店, 人流才開始分散了些少... 想不到發生了食物中毒的事件... 唔...學DODO姐話齋~~~意外, 即係意料之外...小心小心.... (我唔係SELL保險呀!~ 哈)

關於新工...

一言難盡~~~ 哈. 有好有唔好啦~ 不過多好多野學... 始終都係一份銀行Frontline job, 識多好多野... Frontline得黎仲要係由基本sales job 做起, 個種感覺幾好... 不過仲係掌握緊, 努力!

逆思想~!

偶然看到的一段文字... 逆思想, 可以鍛鍊的嗎??? 可以教我嗎??? 求異(求逆)︰就是有意識地去標新立異，要有逆向思惟，想別人之不想，往逆向──相反方向求索。這樣往往容易找到解決問題的辦法。科技活動中教師應鼓勵學生的求異求逆思想，這是一種新的開拓思路的方法，也是成功的一條捷徑。日常生活許多現象都是因為“異”而成為時尚。

兩個英文字

Gourmet --- 美食品嘗家 Sommelier --- 品酒師 努力向呢兩方面邁進~ (不過首要係搵多D $$$$ 先)

星期五 Happy Hour x 2

已經嚮渣打Train左一個WEEK, 老實講後半WEEK其實都幾hea, 久唔久就入機舖打機, 哈~~ 今晚放工, 知道星期六唔駛番, Raymond & Van 提意去happy hour, 我當然主動參與... 哈, 佢地幾個煙剷, 加埋唔食煙既我, 一行五人 (我,Raymond, Van, Patrick and Karen) 過左近牛頭角既House 317 Cafe 飲野, 去得呢區飲都預左普普通通, 果然環境一般, 係價錢算平D咁解囉, 不過勝在就腳, 我地都無乜所謂~ 5條友, 不停就嚮度講番D唔同既同事, 似乎已經分開左兩邊...一邊係勤力踏實型.., WELL...我當然得唔到係呢班, 另一班就係走正面玩野型, 哈哈, 我絕對相信自己係呢team既teammate!!~ 我地5條友又食野又猜枚又玩骰盅, 真係幾正, 講真份工係點樣真係未知, 但係有呢班友仔嚮度都應該會幾開心!~ 玩在一個Happy Hour, 差唔多9點先走, 又出去尖咀再同Lay, 駿駿同胡炳飲~~ 落到Chaser, 當然又係Black Label, 不過唔知係咪之前飲得多左, 同埋自己又"屎"左, 飲完已經上上地, 急急地又邊飲邊食beef berger (因為無食飯), 飲飽食醉又滯滯地... 到左Live Band 環節, 當然唔少得出去跳下UN下, 就係咁, 再加上灌左D Stella, 頂....終於忍唔住出左去湯, 湯完成個人醒哂, 不過真係估唔到咁屎...唉唉...~ 番左入去玩多陣, 吹左陣水, 兩點左右都散左, 坐的士走~~ 第二朝聽駿駿講話佢番到去都湯..., 似乎我地都...削左少少 =_= BTW, 呢個星期五, 好充實好爽~~

中環....

下個WEEK開始要去中環番工... 其實自己幾鐘意中環呢個地方, 呢度既人, 物, 環境, 氣氛.., 感覺都好 Prof!~ 不過..., 最唔好就係, 好遠 =_= 仲要早過以前起身去番工, 唉唉唉~~

我最愛的零食...............之一

其實自己已經比細過少食左好多零食, 仲記得以前放學總會去超巿買排朱古力咬, 而家....WELL...已經唔敢咁做..哈~ 不過琴日執屋既過程俾我發現在罐蛋卷....真係忍唔住要食... 蛋卷絕對係新年送禮既其中一個至愛, 個人黎講真係好鐘意..., 其餘仲有好多.., 例如積及橙餅, 曲奇餅(剩係食提子個隻)等等等等.... 唉, 望多陣...原來我屋企仲有杏仁餅, 甘大滋..., 減肥??? 還是算罷啦~ 罐外 罐內

第一日番工

請容許我講... 我覺得自己今日真係似上緊 Training...亦都覺得咁先似係大公司既 Training... 之前Ricoh入面既野..., 學到呢度一半都夠... 今日第一日番工, 除左係上晝Ice-breaking識下D同事又介紹下SCB同去canteen行下之外, 下晝就正式開始講下D workflow 同 documentation. 詳細好多, 有哂準備, 有哂black and white 講你知個 workflow, 起碼唔會柴娃娃叫你邊做邊學.., 咁先係有系統架嘛...老實講真係幾滿意個training既內容, 對於我呢個未嚮bank做過既 beginer真係學唔少野... 不過過左今日training, 感覺到份工應該會幾難...幾大pressure..., 唔知我捱唔捱得住呢? 之前個兩個week個人真係太hea, 放工完全無累既感覺.. 不過今日放工..., 完全有哂放工之後勁累又勁想訓既感覺... 不過幾好, 起碼覺得自己終於似係番工, 做緊野, 不知幾充實... 哈哈~

究竟我幾時先會執得完...

大家覺得呢個似廳定係似垃圾崗.... =_=

洗風扇....

不嬲除左間唔中吸下塵之外都無乜點做家務既我....終於的起心肝洗左我房把風扇... 原來都好復雜下, 要拆唔少野先洗得到... 諗諗下把風扇已經兩年無洗, 上面D塵多到真係嚇親人... 而家洗完, 望一望, 真係好鬼乾淨, 哈~~ 唉....搬番落去自己住, 真係有好多野要洗...., 但係最唔想洗既...係洗錢~ =_= 不過又好似好多野要買咁....點算~ 水/電/煤/有線電視/ 有線寬頻/電話費/ 差餉/ 管理費/ 添置日用品/ 家具....等等等等.. 唉...Regular Cash outflow實在太多了

睇報章雜誌...

Him, HMC, Capital 系列 (主書, CEO, Entreprenuer), Esquire 及車王... 另外再加 便利, 新假期, 飲食男女, 東Touch, Milk... 與及 信報, 蘋果... 每日都應該分一D時間出黎睇下以上既報章雜誌.... 資訊真的太氾濫, 還是我太貪心???

大屋搬細屋...

雖然唔係細好多..., 但係加埋屋企人D"唔等駛"既雜物... 間屋即刻變得好細好逼...=_= 唉唉, 仲有排執, 點算~~ 執完影張相POST上黎留念....

EQ

應該要加強下自己既EQ...記得要保持冷靜, 要知道自己既目的, 立場, 勢力... 大把野學....哈~ --------------------- 哈, 再一次俾人話我懶..., 做左Sales越黎越懶....點算~

快要離開Ricoh了

呢度D同事都有祝福我, 希望我份新工&將來會有好既發展...~ 最抵死係有同意恭喜我終於逃離呢個鬼地方...哈 GOP有度好, 競爭真係唔大, 番工絕對舒服兼壓力細, 所謂既捽數都係係咁易... 而且同事之間都叫有傾有講, 係夾得埋, 係D senior grade個D仆街D...古古惑惑.. 遞左信之後我基本上都係番工番屋企再番公司又番番屋企/去玩..., 心諗好彩補錢走, 如果唔係呢D頹廢生活都唔知要捱幾耐... 不過都好, 正值我要執屋, 番住工出住糧黎執自己間屋個感覺唔錯...哈~ 期待緊新工既挑戰....~

有無咁多雨落呀.......

Friday, June 24, 2005

六月至今只有一天沒下雨

根據天文台的紀錄，六月份至今本港只有一天沒下雨，而且今年的雨量也比去年同期多。 天文台表示，受活躍西南季風影響，天氣持續不穩，九龍半島中西區及西貢今天上午雨量超過九十毫米，暴雷雨警告繼續生效。

天文台高級科學主任張文瀾表示，這個月以來只有一天沒有雨量紀錄，至今香港已錄得五百多毫米雨量，遠多於過去年全年同期。

張文瀾表示，六月的天氣通常都比較不穩定，二零零一年香港就曾錄得逾一千毫米的歷來最高紀錄，預料未來幾日仍然有雷雨，要到下周初天氣才會好轉。

天文台今年五月共發出七次「黃色暴雨警告」信號，這是這警告系統自一九九八年推行以來在五月份的新紀錄。此外，上月共錄得雨量達五百零八點六毫米，較正常高約六成一。

再一次証明什麽証券行分析是 Bull Shit!

嘆為觀止... ===================== 2005年6月22日 證券報告 - 花旗料偉易達全年盈利倒退56%花旗預期, 偉易達去年收入上升2.0%至9.35億美元, 純利下跌56%至2,100萬美元,全年派息為0.03美元。 全年業績包括計入一項成功索償660萬美元收入。花旗稱, 由於V. Smile產品表現強勁, 帶動電子學習產品全年收入上升61%; 電訊業務則由於市場競爭激烈, 平均售價萎縮, 預期收入將下跌12%至6.08億美元。 花旗認為, 該公司05財年業績欠佳已反映於股價上, 料06財年盈利將見復甦, 予其目標價14.2港元。 ===================== 2005年6月23日 證券報告 - 花旗調高偉易達目標價至26.4港元花旗美邦表示, 偉易達(303.HK)05財年業績優於該行及市場預期, 調高該公司06-08財年盈利預測, 將目標價由14.2港元大幅調高至26.4港元。 花旗稱, 該公司去年盈利復甦, 業績優於該行及市場預期, 由於調高電子學習產品業務的收入及毛利率預測, 故大幅調高06-08財年盈利預測49-81%, 最新預測06及07財年盈利分別為6,100萬美元及7,300萬美元。 花旗稱, 該公司05財年盈利優預期, 主要由於電子學習產品業務表現強勁,V.Smile產品帶動銷售收入, 而傳統產品表現亦較預期理想, 但電訊業務則處於困難的一年, 並相信今財年仍會面對重大挑戰。花旗維持該股「買入」評級, 該股現以06年市盈率5.3倍買賣, 價值具吸引力。

怕死

陳奕迅 - 怕死 真係好鐘意首歌... 我真係好怕死, 因為...太多野想做未做~ 朋友, 有無諗過你有咩想做未去做? 我既推介: 1. 環遊世界 2. 試盡 World Wide Top 100 間餐廳 3. 擁有至少兩棟物業, 一棟自住, 一棟放租 4. 成立一間公司 5. 組織一個美滿家庭

入左青衣食飯

今晚入左青衣食飯, 為左就J君一次~ 因為次次出去食飯都無理會到J君屋企嚮青衣, 好遠既關係... 我地結果係食Pizzahut, 其實係想去試軟腳(殼)蟹PIZZA, 食落OK啦, 叫多左少少, 都係我地四條友 J君J小姐, Y小姐同小弟... 唔係好食得哂... 之後落左去飲杯野, 走個陣...唉...俾J君老點左行到好遠去搭巴士, 又落雨, 又唔係快...蝕桌... 呢期超眼訓...無乜精神寫BLOG.. 其實好想講下遞信時既野同埋呢排嚮公司幾咁hea.....有機會先啦 =_=

搬屋行動一之官塘-->沙田

任務完成~ 攪足一日, 好累 =_= 行動二之官塘-->官塘將於不日進行, 並設下死線於七月七日....

N個月前既一篇文章

由於想執一執個Desktop, 發現呢個 "New Text Document.txt" 入面既野仲幾有意思, 索性將佢 Paste上黎~~~ (內容擇錄自老曹日記) 　　決定你係窮人抑或富人有十大標準。 　　一、自我認知。窮人好少諗如何去賺錢及點樣才能賺到錢，好聽D係「安貧樂道」，唔好聽係「不思進取」。反之，富人天生強烈賺錢欲，會想盡一切辦法去致富。 　　二、休閒。窮人認為「食少多覺訓」，寧願花時間睇《大長今》，仲要加入《大長今》熱去吃韓菜。富人冇興趣睇肥皂劇，只會動腦筋《大長今》熱中賺一筆。 　　三、交際。窮人喜歡同窮人做朋友，心理上排斥有錢朋友，唔係有錢朋友睇唔起佢，而係自卑心作怪，結果只研究邊度有廉價套餐、邊間百貨公司大減價……。反之，富人交際往往研究股市點睇、匯市點睇、樓市點睇、邊處有錢搵。結果窮人只知邊度有廉價套餐邊處大減價，富人卻知道邊度有錢搵。 　　四、學習。窮人學手藝，以便一技旁身天下通行；富人學投資，懂得錢搵錢。 　　五、時間。窮人時間唔值錢，可以跑遍港九新界去買廉價貨慳番幾十蚊，但浪費一整天時間。富人偷閑，閑在身體，例如打高爾夫球其實係傾緊生意，腦袋冇一刻停過；窮人偷閑，閑在思想，忙著去麻將桌上摸幾把或研究馬經。 　　六、金錢態度。窮人經濟觀係節省，勤與儉，慳得一萬就係一萬，甚至投資亦離唔開「雞生蛋」理論。例如我老曹2002年叫人買金，唔少人回答冇息收，佢地估唔到金價三年升值50％（由二百八十美元升至四百二十美元），而斤斤計較雞會否生蛋。幾多股份雖然冇息派，但一年股價上升100％，窮人一聽到冇息派已冇晒興趣。 　　七、激情與感情。窮人只有感情，聽完新馬師曾唱《萬惡淫為首》便流淚兼捐錢，感情太豐富兼有代入感，好易受感動。反之富人卻不易受感動，例如1989年六四事件居然認為滿街鮮血係入市時機。 　　八、自信與自卑。窮人自卑，有D錢便穿名牌戴名錶渣名車才能增加自信，十分介意人地點睇自己。富人自信而不自卑。李實發係典型例子，藍色西裝十年如一日，戴精工表，飲自己公司屈臣氏售賣既廉價紅酒……。以前郭得勝又係另一例子，永遠坐日本車，因為慳油……。呢份自信令佢地光景不佳時唔悲觀，繁榮期亦只謹慎樂觀；反之，窮人嚮繁榮期亂花錢，嚮衰退期呼天搶地。 　　九、習慣。有個富人見自己親戚太窮，送一隻牛畀佢。窮人滿心歡喜，但諗到牛要食草，結果將牛賣掉，買D雞養希望生蛋，結果幾天之後劏左隻雞食，一年後富人去探望佢，佢依然故我仍然係窮人一名；窮人習慣今朝有酒今朝醉。原來富人自己年輕時亦冇錢，辛辛苦苦儲錢買隻牛，然後到處帶隻牛去食草渣奶賣，賺到錢便買羊生羊仔賣錢，然後開農場，最後變得富有。富人以為送隻牛畀親戚可令其發達，但唔明白窮親戚未養成儲蓄與投資習慣，每年送佢一隻牛亦無法脫貧。 　　十、上網。窮人上網搵娛樂，富人上網搵投資機會。結果窮人愈上網愈窮，富人愈上網愈富。 改變金錢觀念勝過留低家財 　　為何富不過三代？因富人只把財富留畀親人，而非改變佢地對錢既觀念。一如上述富人向窮親戚贈牛，而非教佢養牛。 　　給窮人一條魚今餐佢有得食，教曉佢捉魚佢便有謀生技能，培養佢管理漁場技巧佢便可以發達。貧與富最大分別在此！ 　　唔少人認為唔夠時間用，解決方法好簡單，就係將電視機關掉。1998年研究結果，一般人每天有5％時間浪費嚮電視機前，睇電視結果係將10％收入花費在無謂野上（買自己唔需要既野）。睇電視已成為現代人最大浪費，包括時間與金錢。減少睇電視後，一般人感到人生快樂多15％，如把睇電視時間改為睇書，你會感到人生快樂多30％。 換言之，如何從不滿足不快樂轉為滿足同快樂？方法好簡單，少睇電視多睇書便可以有一個快樂人生。令人快樂既書係乜書？原來係有關浪漫小說，57％女性喜歡浪漫，43％男性喜歡浪漫，睇浪漫小說令人身心愉快。古典音樂及鮮花有助浪漫氣氛，情人節令人感到浪漫既唔係鑽石，而係鮮花加古典音樂。

呢個六月發生好多事....

搬屋啦...終於自己一個人住~ 搵到工啦, 舊工番到月尾咋... 唔知仲有無呢? 實在係一個幾大既轉變~

8 + 866 (2)

小弟嚮圖書館睇哂成份信報, 談及呢單交易既報導亦實在不少, 可以睇得出呢次既收購李生最主要係想得到3G牌照..... 不過小弟朋友D君於8號仔打工, 從他的聽聞得知, 他自己唔太睇好3G發展, 因為佢知道內部正研究緊無線網絡與流動通訊既結合...如果他所聽屬實, 咁我又唔明白啦...諗住攪WLAN, 又仲乜走去搞3G? 係默認3G 對流動通訊己經足夠定係預計WLAN 既發展唔順利? 真係一大個問號.... 報章寫話3G於手提有助8號既寬頻電視等等娛樂資訊融入流動電話, 呢個的確會係一個幾好既合作, 不過就背道左固網業務既發展了... 加上SUNDAY業務仲要大量投放資金發展, 與3, CSL 及 smartone-vodafone抗爭, 夠竟會係點, 呢場仗又易唔易打成, 真係大家心裏有數... 或者可能李生放眼唔係嚮香港呢個巿場, 係大陸同906合作, 發展中國呢塊肥豬肉先真..... 未來黎講真係幾有興趣睇下 新世界電訊同萬眾電訊會點算..., 維持2g服務可以話只會令arpu每況愈下, 係咪會有收購合併發生, 真係值得研究... 不過如果小弟都分析得出 8+866 係唔掂, 呢件事情可能就係太明顯..., 以相反理論黎講..., 反而可能係一路奇兵... 即管睇下李生個仔有咩搞到出黎..., 我自己就一定唔敢掂..., 俾我揀, 排941, 315, 728 都未輪到佢.... 拭目以待....

8 + 866

8 = PCCW 866 = SUNDAY 呢兩日財經界其中一件重要事我相信一定係小超人打算全面收購SUNDAY, 雖然唔知佢會唔會私有化埋及取消SUNDAY既上巿地位, 但係據佢既打算及計劃, 始乎電訊界又會有一場具大既競爭 (良性定惡性我唔敢講)... 話說8號仔之前都有流動電話網絡 (CSL), 但係因為負債累累最終都要賣左俾人, 而家又重操故業, 夠竟係想點? 只有佢地圍內人至知..., 不過可以肯定既就係 SUNDAY 既網絡公認係差, 因此要用平價去吸引/挽留客戶, 賺錢能力自然有限, 夠竟買佢番黎, 佢地有無諗住改善呢樣野先? 我自己本人就用緊數碼通(而家要加埋Vodafone), 由N年前 Extra (即係PCS網絡) 既時代已經用緊, 一路都幾滿意個服務同網絡, 加上價錢又唔係話特別貴 (其實相對都係貴$10-$20左右), 身邊朋友又多係用數碼通既 (可以用 "自己人" 優惠), 所以黎講如果佢個SERVICES唔係話特別吸引, 我基本上唔會考慮轉... 再加上佢計劃將 固網及流動網絡 "綑縛" 推銷 (個人黎講硬係覺得綑縛係負面...=_=), 即係話兩邊都會減價/優惠黎推銷, 以求增加所謂既 巿場佔有率, 但係首先黎講固網電話既重要性可謂日漸下降, 而家連小學生都用手提, 加上手提既分鐘經常用唔哂, 再加上朋友D電話入哂落去手提個PHONE BOOK, 再再加上部電話多數只會自己用 (略為有私隱D), 所以黎講至少自己打電話既時候多數都會用手提打, 索性連固網電話都取消埋佢... 咁佢所謂既 綑縛式推銷, 對我既吸引力都可以話係大減.... 8+866..., 情況比聯想+IBM PC 更為難想像, 就股價而言, 即日既效果就係 8 號跌 (徒添負債), 866 升(炒高佢派貨), 實屬正常預測... 至於李生話要成為第一網絡....WELL...Time will tell... 今晚番屋企詳細D研究下佢既內容, 睇下有無咩玄機... 不過計我話....李生個D野都係少掂為妙 (以上純屬表面意見, 實在未經過研究分析~~有錯請指教)

MP3在升降機內

話說今日番到公司入左部LIFT, 我仲以為自己入左去一個STUDIO, 後面有位同事聽著他的隨身聽, 播著他所喜歡的音樂... 嘩, 撞佢個鬼, 駛唔駛開到咁大聲呀? 我真係唔知佢係咪DEAF既, 大聲到好似我自己聽住HEADPHONE咁, 我心諗, 係你個耳筒散音勁定係你本身就係諗住播俾我地聽... 真係好想同佢講叫佢較番細聲D, 對耳仔唔好....話哂都一場同事 (雖然我唔識佢)...

終於報左名

終於報左 HKSI LE Paper 1, 呢個試都拖左好耐, 今日終於下定決心考埋佢, 考完係咪做呢行係另一回事, 考埋佢最主要係實行番自己既諾言, 同埋做野有始有終 (詳看此 Post ..... ) 得番兩個WEEK去讀, 希望有心機/時間讀, 事關呢排個人真係幾懶, 有少少連搵工都懶左...唔知想點...

番左中大游水

中大....依然係一個我好鐘意既地方~~ 今日晏晝又番左中大游水, 貪佢個泳池夠少人, 夠乾淨, 夠平而且沖涼又爽~ 加上四小時既免費泊車, 真係幾好FEEL~ 今日雖然唔係游左好多, 但係嘆下又吹下水, 享受左一個晏晝~ 游完水上左去搵鄧經理吹水, 講下開Cafe D野, 可惜佢地今日仲清潔緊, 無得嚮度食埋飯~~ 傾左陣之後車埋佢地番黃大仙, 我就同黎忠及阿歷屎嚮APM食飯~ 去左紅螞蟻 (其實係因為其他都排長龍), 野食都OK, 傾左陣, 行左陣, 咁就嘆左一個美好既星期日~~~ (美中不足係夜晚落雨, 個人黎講唔太鐘意...~)

今日Interview

開頭見 HR Manager 都好地地, 我覺得我應付 HR Manager 完全無問題, 佢地咪又係考下你英文, 問下你D頹問題... 接住見埋 Sales Manager, 唔講得笑..., 嚮 Sales Manager 面前有少少感覺一棟都無..., 真係有經驗同無經驗既分別, 俾佢問到我口啞啞... 係咪我真係經驗唔夠..., 定係嚮Ricoh唔夠勤力學野唔夠呢? 真係要反省下自己Sales Technique.... (仍然希望佢會請我.....)

聽日又Interview

Standard Chartered Bank 既 SME Sales. 自己個心態都好似有少少由 Retails 轉左去 Coporate ... 係好定壞真係唔知.. 不過本來今日想講下呢幾年黎飲飲食食既轉變, 都係遲D再寫啦~ 祝我好運!~

酒~

近排酒量淺左... 或者紅/白酒的份量最適合我 : ) Glenfiddich

大為欣賞的回答方法

(轉載自 rm501君的Blog) ********** 電話響。 「喂？」 「你好先生，我叫 xx 是 Sunday打來，先生你是否 9xxx-xxxx 的機主？」 「係。 點？」 「無，我想同你介紹一個最新的優惠計劃，月費加 $30 就可以發一百個短訊……(下刪字若干)，你有沒有興趣 join？」 「哦。 對不起，沒有。」 「為什麼呀﹖ 才三毛錢一個，比你現在的便宜很多呢！」 「對不起，真的不需要。」 「真的是個好優惠，能給你省錢呢！ 為什麼不要呀﹖」 「 為什麼﹖ 因為我有錢。」 「 …… 」 「 …… 」 三秒後電話掛斷。 ********** 真的很精采, 我自己都收過同一個Sunday的推銷電話, 我都只係用 "我唔需要" 之後直接收佢線..., 感覺上好似有點兒 "蝕桌" 既感覺...~ 不過諗諗下都係唔好咁衰, 話哂自己都係一個不折不扣既 Sales...... 哈

手提電話?

近期心郁郁想換電話.... Sony Ericsson 的 K750i 確實吸引.. 1. Sony 機的界面有所保証 2. 200萬像素自動對焦相機連4倍數碼變焦及可拍攝短片 3. MP3 及 影像播放功能 4. FM 收音機功能 5. 藍牙, 三頻, GPRS, WAP, 可收發電郵 細心諗下.., 以前沒有手提電的日子...? 細心諗下.., 而家電話既功能.... 會唔會多得有D過份? 我而家連錶都無帶, 時間都係靠電話... 其他有D電話甚至有埋PDA/e-wallet功能... 朋友....你夠竟係想要部電話定係要哂咁多野? 要咁多你又用到幾多 ??? 打電話既呢個功能遲D應該變為附加功能.. 即係話你第時有機會買到一部 七百萬像素數碼相機, 3倍光學變焦+3倍數碼變焦, MP3, 影片播放, 手提遊戲機功能, PDA, 等等等, 另外最尾加多行 "可作電話打出及接入" ... Well... 開始有D本末倒置的感覺... (不過你咪理..., 我都好想要部K750i ,.... 因為係身份既像徵, 潮人既記號....哈) K750i

呢排睇多左人地D Blog

自己都想寫下身邊發生左既事既意見... 好, 練習下寫文章先!~ 練下D獨立思考~

站在人群外

今日得閒得滯去左交通銀行荃灣沙咀道分行入面睇人... 無錯, 係睇人..., 睇住無數既人對著股票報價機面露各種表情... 對著無數數字的跳動, 心情緊張地討論著, 按著鍵盤, 再討論著... 有擔憂的, 有高興的, 有認叻的, 有呻苦的..., 各種各樣都有... 我站立於他們背後, 縱然我對股票報價機上的數字也關心 (點解? 因為我都有 "投資" 的), 但係我更關心他們的討論..... 老實說....散戶門的意見真的很 "燈" 哈, 愛上在背後觀看報價機前的人們....

多謝朋友關心

多謝身邊既朋友關心, 小弟近排真係有少少鑽牛角尖既感覺..., 硬係做咩都唔對樣咁... 我會試下去correct番呢種諗法..., 總之就盡力之餘唔好俾自己太大壓力....(雖然我係要求自己幾咁高都好...) 多謝 P君同J君, ~ (請對號入座)

對食的要求...

今日同阿爸阿媽出街食飯, 事事旦旦揀左裕民坊間 D&J 上海坊... 其實個人黎講對呢間野真係麻麻, 又唔好食又扮多人等位, 食得又好趕咁..., 不過APM實在太多人所以無所謂地去呢間食... 我去到個陣原來已經叫左送, 我無所謂咁就尤得佢啦~~ 點知....哎也...佢地竟然叫左兩籠(共八隻)小籠飽, 兩碟(共六隻)煱貼....oh no.... 點解會叫左Double.... 野食試下咪算囉, 又唔係唔夠分..., 兩樣野起孖, 實在多左少少... 同埋另一樣野..., 發現老豆食得真係好快..., 需知道食講求享受, 食咁快...不如去食快餐, 事旦搵D野倒落肚度算..., 又或者事旦叫三碟上海粗炒倒落肚就算.... 何必叫咁多唔同既野, 而又仲要食得咁快??? 或者真係我而家開始對食都幾講究..., 唔係價錢上既講究, 係食法同環境既講究.. 需要知道, 我既格言 "吃喝玩樂, 不勞而獲" 5樣野都咁重要, 次序仲要係無分先後架....~~~ 哈哈哈~

記住記住...

無論咩野都改變唔到都好... 自己心態一定可以改... 唔好俾自己唔開心!!!

犯太歲

今日忽然間諗起自己今年犯太歲... 開始覺得好多野都唔係太順利... 係我既心態出現左問題, 定係事實如此? 我好似好多野都把握唔到, 做唔到決定咁... 好多野變得特別麻煩, 變得唔識點處理... 想轉工, 想辭職休息... 但係到原本諗住遞信個日又驚無工番而想延遲.... 究竟我想點...? (此感想係嚮公司打既.....=_=)

我醉了...

琴晚係公司生日會, 由我地GOP Team去搞, 有抽獎有蛋糕食有遊戲玩, 個場都唔錯, 仲有K唱添, 整體上黎講真係攪得我自己認為幾滿意.....~ 上面只係交代背景..., 琴晚我終於試過醉左既感覺..., 原來真係乜野都唔知, 完全空白左..., 琴晚又啤酒又Chivas又捷克烈酒又cocktails最後再黎Chivas..., 不停咁倒酒落個肚到...我都唔知自己仲乜事會咁..., 係有感觸? 定係真係玩得咁開心....我自己都唔知~ 結果醉左..., "LUM" 左, 要勞煩阿詩送我番屋企..., 真係嚴重...仲要嚮架的士度嘔....真係失禮....不過番到屋企我仲沖得到涼仲吹埋頭先訓....我估都叫做清醒番D... 今朝起身...., 個頭勁痛....酒醉後遺症...真係幾辛苦... 不過我覺得, 只要係為左開心而飲, 我覺得醉都OK.., 當然盡量唔好啦..., 麻煩到其他人~

Cigar Party

夜晚Ivan叫埋我去一個Davidoff既invitation, 嚮 JW Marriot, 嘩, 真係大開眼界, 六星級係唔同D..., 免費Cigar, Wine, Whisky, Ham, Cheese..., 完完全全俾人覺得我絕對係一個Starter..., 同Ivan吹下水, 又係傾下男人傾既話題~~ $, 工作, 女人, 車, 樓, 股, FX, 吃喝玩樂咁..., to be honest, 佢都教左我幾多野..., 雖然可能係教壞我, 哈哈... 嘆左支手卷Davidoff, 兩杯Black Label..., 可惜唔係星期五, 不過今晚真係幾Relax~

終於去左 Interview

鬼打咁早起身...(其實都遲過平時番工), 落左去坐亡命VAN入上水..., 唉, 真係漫漫長路..., 坐VAN仔都要50分鐘..., 之前番中大都係20分鐘..., 遠到呢.... 好啦, 早左少少去, 夠時間俾我咬埋個老早先, 9:45入左去等, 等到我10:15 先黎in我.., 係咪真係咁忙呀...., 遲少少我真係想同佢講 Sorry, 我有野做走先.... 3rd Interview...問埋D野又係同 1st & 2nd 差唔多...therefore 我都係遁例咁答下佢..., 我唔知係咪自己衰啦, 覺得要入到上水番工真係唔係咁願意, 所以今日雖然都有盡力去答, 但係都係頹頹地咁...唉...我自己都覺得自己麻煩... 嚮出面等個陣見到D人好多都講國語..., 第時我唔通又要咁??? IN 完..., 又番番公司做野..., 個心態依然係覺得好遠...., 真係有D唔開心 =_=

3rd IN....

今晚喜出望外地HSBC打黎叫我再 Interview...但係要入到上水去in個 district manager... 係咪即係我要去上水番工??? 好遠.....=_=

薪 俸 稅 ： 9 大 慳 稅 TIPS

1. 睇 睇 自 己 有 乜 免 稅 額 ， 包 括 ： 供 養 父 母 免 稅 額 、 居 所 貨 款 利 息 扣 稅 ( 包 括 車 位 在 內 ) 、 子 女 免 稅 額 、 個 人 進 修 開 支 扣 稅 等 。

2. 若 家 中 多 人 均 可 享 父 母 免 稅 額 ， 以 薪 酬 最 高 、 繳 納 邊 際 稅 率 最 大 者 申 領 獲 益 最 大 。

3. 新 財 政 年 度 父 母 免 稅 額 年 齡 限 制 下 調 ， 合 資 格 者 今 年 填 報 可 減 低 暫 繳 稅 金 額 。

4. 供 樓 利 息 扣 足 十 四 年 每 個 納 稅 人 ， 一 生 可 享 有 七 次 居 所 貸 款 利 息 支 出 扣 稅 ， 每 年 上 限 十 萬 元 。 由 於 使 用 次 數 有 限 ， 所 以 最 好 待 購 置 新 居 、 轉 按 或 加 息 期 ， 即 按 揭 利 息 開 支 較 重 時 使 用 ， 便 最 數 。 如 果 夫 妻 感 情 夠 好 ， 二 人 接 力 以 個 人 名 義 擁 有 物 業 ， 可 扣 足 十 四 年 稅 ， 比 聯 名 持 有 慳 得 多 。 不 過 ， 稅 務 局 副 局 長 譚 權 壯 提 醒 道 ， 夫 婦 間 轉 名 必 須 做 足 買 賣 手 續 ， 付 清 印 花 稅 及 土 地 註 冊 費 ； 如 以 送 契 形 式 轉 讓 物 業 ， 便 不 能 扣 稅 。 假 設 ： 一 對 年 薪 各 $25 萬 的 夫 婦 ， 不 須 供 養 父 母 及 子 女 ， 扣 除 個 人 免 稅 額 及 強 積 金 供 款 後 ， 兩 人 各 須 繳 稅 $16,800 ， 合 共 $33,600 。 去 年 四 月 ， 二 人 買 入 一 個 $200 萬 的 住 宅 單 位 作 居 所 ， 以 九 成 按 揭 、 二 十 年 期 、 按 揭 利 率 定 為 P-2.5% （ 現 P 為 5.25% ） 計 ， 每 月 還 款 額 為 $9,759 ， 當 中 約 $3,600 是 按 揭 利 息 （ 首 七 年 平 均 計 ） 。 假 如 物 業 是 聯 名 持 有 ， 報 稅 時 ， 須 均 分 該 年 的 居 所 貸 款 利 息 支 出 ， 即 每 人 的 總 入 息 可 扣 減 $21,600 ； 各 須 繳 稅 $12,480 ， 共 $24,960 。 即 七 年 共 慳 稅 ： （ $33,600 - $24,960 ） × 7 = $60,480 但 如 果 業 權 由 二 人 輪 流 持 有 ， 譬 如 先 由 丈 夫 單 獨 持 有 物 業 七 年 ， 期 間 他 每 年 都 可 扣 減 全 數 利 息 $43,200 ， 故 只 須 繳 稅 $8,160 ， 而 妻 子 則 繳 $16,800 ， 一 樣 共 $24,960 。 之 後 只 要 將 物 業 轉 名 予 妻 子 ， 便 可 再 享 七 年 的 居 所 貸 款 利 息 扣 減 。 由 於 息 隨 本 減 ， 其 後 七 年 每 月 還 款 平 均 只 有 $2,400 是 利 息 ， 故 她 一 年 可 扣 減 $28,800 入 息 ， 須 繳 稅 $11,040 ， 而 丈 夫 則 繳 $16,800 ， 共 $27,840 。 即 十 四 年 共 慳 稅 ： $60,480 × 7+ （ $33,600 - $27,840 ） × 7= $100,800 $200 萬 住 宅 單 位 轉 名 的 印 花 稅 及 土 地 註 冊 費 ， 約 花 $15,450 。 即 使 如 此 ， 個 人 持 有 物 業 始 終 比 聯 名 持 有 更 數 ， 可 多 慳 $24,870 。

5. 最 筍 推 介 ： 僱 員 租 金 津 貼 扣 稅 X 退 休 父 母 個 人 物 業 稅 如 與 父 母 同 住 ， 譬 如 單 位 業 主 為 父 親 ， 一 樣 可 用 薪 金 轉 租 金 津 貼 的 方 法 慳 稅 。 只 要 做 足 正 常 租 務 工 夫 即 可 ： 自 己 與 父 親 簽 訂 租 約 （ 一 般 物 業 代 理 可 提 供 ） ， 然 後 拿 到 稅 局 支 付 釐 印 費 （ 年 租 的 0.25% ） ， 再 將 已 蓋 上 印 花 的 租 約 和 每 月 租 單 的 副 本 交 予 僱 主 。 假 如 父 親 已 退 休 ， 年 租 收 入 又 不 超 逾 十 萬 元 的 個 人 免 稅 額 ， 他 便 不 用 繳 付 物 業 稅 。 再 者 ， 此 安 排 不 會 影 響 供 養 同 住 父 母 的 免 稅 額 的 申 請 ， 可 謂 慳 到 盡 。

6. 計 盡 必 要 搵 食 開 支 「 試 過 有 夜 總 會 小 姐 ， 拎 返 工 衫 俾 個 稅 務 官 睇 。 一 睇 ， 果 然 唔 著 得 出 街 ， 就 成 功 扣 稅 。 」 李 文 輝 表 示 按 稅 務 條 例 ， 凡 完 全 、 純 粹 及 必 須 為 產 生 入 息 而 招 致 的 支 出 ， 例 如 往 返 公 司 與 客 戶 之 間 的 交 通 費 、 上 班 制 服 的 洗 衣 費 等 ， 均 可 扣 稅 。 一 般 來 說 ， 攝 影 記 者 的 專 業 攝 影 器 材 、 大 學 教 授 的 教 學 參 考 書 、 小 提 琴 家 過 百 萬 元 的 古 董 提 琴 等 ， 都 視 為 資 本 開 支 ， 可 享 折 舊 免 稅 額 。 此 外 ， 須 具 專 業 資 格 的 職 業 ， 如 保 險 經 紀 、 會 計 師 或 律 師 等 ， 每 年 亦 可 申 請 一 個 專 業 團 體 的 會 員 年 費 扣 稅 。

7. 減 薪 失 業 　 可 暫 緩 交 稅 假 如 預 計 自 己 在 下 個 課 稅 年 度 的 收 入 ， 將 較 上 年 度 減 少 逾 一 成 ， 可 於 到 期 繳 款 日 之 前 二 十 八 天 ， 向 稅 局 說 明 原 因 ， 申 請 暫 緩 繳 交 暫 繳 稅 。

8. 選 擇 電 子 報 稅 可 獲 延 期 交 報 稅 表 優 惠

9. 必 須 在 限 期 前 交 報 稅 表 !!!!

今日已經係 2nd In of HSBC FPM

唔知結果會點呢?? 期待....?

原來做記者都幾辛苦...

今晚應Tereza既邀請充當一晚 event helper, 嚮老蘭幫手搞一個嘉士伯既 promotion marketing event, 去到先知原來有明星, Carl 同 2R, 好多人, 好多fans 嚮度... 我結果臨時拉夫做左大會攝影師, 負責影低全場D活動花絮... 嘩, 原來真係好辛苦架, 又要爭位影, 逼哂D記者嚮度, 又要嗌, 叫2R同CARL望住黎影, 又要就位, 嚮人堆度鑽, 好彩我叫在大會指定, 有食蕉哥哥幫我開路俾位我入, 但係都要係咁逼...適逢今日又勁熱又毛毛雨, 其實真係幾辛苦....開頭我仲以為記者又係一D好FREE既工作...但係經過今日一試....真係一D都唔簡單... 我都算叫做影完就OK, 佢地仲要番去寫稿....哈..., 原來都係sales 好....

無得上網...

話說星期日零晨雷聲一響, 當然直接地嚇不到我, 但係因為行雷影響寬頻訊號, 令我星期日及星期一兩日都上唔到網...呢下真係最驚嚇.... 原來兩日無得上網真係好唔自在..., 我會唔會係有個D咩咩網上唔知咩症候群, 一無網上就有D唔自在咁....哈~~ 好似同朋友失去聯絡, 同資訊斷絕關係一樣.... 不過亦因為咁樣, 令我有時間睇下買左而又未睇既書&雜誌... 太過依賴Internet啦...., 我諗有時我要試下熄左部電腦做下自己野先得..... 唔知做唔做得到呢~?

足球...就是這樣充滿感情的..

今晚睇英超, 特別有味道, 因為四隊球隊為左護級爭個你死我活,四隊之中只有一隊可以留底... 我今晚睇既係修咸頓對曼聯, 隨著球賽每分鐘進行, 修咸頓曾經擁有領先優勢, 再加上諾域治大敗給富咸, 彷彿可以勝利並護級成功... 冷不防曼聯轉眼間追和, 及後在下半場領先, 修咸頓的球員與及球迷的心情來了一個180度的轉變, 要降班的事實實在不可以一時三刻可以接受... 那邊廂西布朗及水晶宮亦有另一方面的精采, 先有水晶宮的領先, 想著另一球場上修咸頓, 諾域治輸波, 西布朗的勝負可以不理...誰不知, 球賽末段被對手查爾頓追和, 絕對時向水晶宮"淋了一頭冷水", 白白看著最安守本份, 在場世界睇淡下贏了波的西布朗拿下下屆英超份子的一席位... 護級絕對比奪標精采... 望著修咸頓球迷由絕望, 轉為全場起立支持球隊, 這種精神絕對可嘉...望著西布朗做足本份, 四隊護級球隊唯一贏波並留守英超, 球員球迷的喜悅絕對超過一切... 足球就是這樣帶級球員球迷等的喜和憂, 那種感情, 那種熱情, 那種情感絕非筆墨所能形容... 如非熱愛足球, 你不會感受到那一種足球的魔力... 波...就是圓的..., 但內裏的神奇, 實在一言難盡.. 引用黃興貴的名句... "一個字....精采"

食生蠔要注意的地方

【明報專訊】活的「生蠔教科書」Dennis，不但了解生蠔產地，更懂得啖蠔常識，經他解說後，平添啖蠔情趣。 ●吃有序﹕吃生蠔要有次序，由味淡的開始，吃至味濃。 ◎原 因﹕濃味會蓋過淡味的生蠔，不順序吃便會愈吃愈沒有味道。 ●輕起肉﹕要起出蠔肉，勿用叉子剷蠔殼，應用利刀把肉輕輕刮離蠔殼。餐廳應代食客預先處理妥當。 ◎原 因﹕蠔殼夾層內藏污濁海水，若剷爆蠔殼，滲出的海水奇臭無比，只要沾上一兩滴，便足以破壞整隻生蠔的鮮味，即行內說的「爆殼味」。 ●講時令﹕揀蠔宜先知道產地季節，地處寒冬或開始回暖的，肉質也有分別。 ◎原 因﹕地處寒冬的生蠔，肉質爽脆﹔若接近回暖地區，肉質會變得似牛油忌廉一般，偏向肥滯，口味視乎各人喜好。 ●選醬汁﹕生蠔肉質若似牛油忌廉或偏肥滯，勿灑以檸檬汁佐吃。

Ricoh Ichiban Presentation Dinner 2005

話說今晚去左公司 Dinner, Well.. 又係一個大型既拍手會... 越黎越覺得人生事業係好講際遇, 而際遇黎講永遠都係有得有失, 你絕對可以話個天對你公平, 但係你可以諗下自己Prefer邊一邊.... 以小弟為例... 入黎Ricoh, 入左一條十分渺小既Team, 無錯呀, Immediate老細係對你幾好, 但係再上既人就係一條仆街....嚮一條細Team, 就好似你入左一間細公司一樣..., 俾你有幾叻, 幾勤力幾 Smart, 你既發展空間同潛力都係有限.... 感覺上你係比人搵多D錢, 但係如果同其他 Team 同事比, Bull shit..... 當然, 如果我入黎係去左另一條 Team, 老細絕對可以係仆街, 而且亦會因為留戀而放棄左其他機會.... 我知道而家有好多機會嚮街上面..., 我要執起呢D機會啊!!! Ricoh..., 我還是要放棄罷.... 這裏並不是我留戀的地方..... 到左呢個時間, 已經對份工無哂興趣/心機.... 非...走...不...可...

心情唔靚...

今日IN HSBC FPM, 個狀態唔好, 答野又答得唔準確....我好少 Interview 咁差....唔通太耐無 Practise? 琴日睇到呢個 News..., 心情更灰... 中大畢業生平均月薪上升 http://hk.news.yahoo.com/050510/12/1ccw9.html 5月 10日 星期二 15:25 更新 中文大學調查顯示，04年畢業生(不包括醫科生)的平均月薪為11,266元，就業率95.6%。 中大去年11月至12月用問卷訪問了2,500名04年本科畢業生和03年醫科畢業生，了解他們的就業情況。 結果顯示，本科生到去年9月的受聘率為95.6%，較去年上升6.6%，平均每人獲得2.24份聘書，他們平均月薪11,266元，上升5.9%。如包括醫科生在內，平均月薪13,628元，最高薪酬的畢業生為一名醫科生，平均月入65,000元。 調查又發現，找到工作的被訪者中，75.9%加入工商界; 12.4%受聘於社會及公共機構;9.9%任職教育界，1.9%加入政府部門。

D 工終於有番D聲氣...

今日又SEND多兩份工出街, Hangseng同美銀..., 希望有Feedback~~ 呢輪D工有番D聲氣, 琴日去左 HSBC 個 Career information session, 照計都有得in HR既..., 要睇到時造化... 下星期一 in IBM Sales Specialist..., 又係一間好有情意結既公司 (另一間係 Hangseng)... 努力!!!!! 我要証明俾你班so called senior management 睇, 你地咁樣對D員工, D員工一定會飛起你地....

APM

以下係暫時食過既APM餐廳/舖頭 1. Roma Roma 2. 滿屋甜品 3. 潮館 4. 魅碗 5. 赤丸製麵所

大頭蝦

今日去左Roma Roma@APM諗住請BECCA食飯慶祝生日... 頂....點知唔記得左請.. 真係大頭蝦 >_<

呢幾日去左...

元朗大榮華 同埋 峰壽司~~~ 先講元朗大榮華, 我地BOOK左6點 (因為只可以BOOK6點或者之前), 我地5點30去到, 先去食勝利牛丸 (同樣係元朗出名) , 跟住上去大榮華~~ 嘩, 多人到呢, 我真係覺得唔BOOK位係無可能有位的 =_=...好彩我地BOOK左, 6點鬆少少就有位啦, 叫送呢D工作當然唔駛我做, 哈~~ 我地合共ORDER左十幾樣野, 其中有幾樣真係好正, 雞, 鴨, 豬油撈飯, 馬拉糕同水晶飽直頭係全日推介, 整體上黎講真係唔錯, 食到我地飽哂, 仲有糖水送, 攪到臨尾我地要抽籤食埋剩番D野, 真係好飽好滿足, 哈~~ 可惜食得飽得滯啦, 再唔可以嚮元朗食埋糖水 lu, 結果就好滿足地離開元朗 (第日仲要番工=_=).. 今日嚮大榮華食過既野有....1. 圍頭五味雞2. 香茜燒米鴨3. 蟹肉冬茸羹4. 雞蛋焗魚腸5. 蜆介炸鯪魚球6. 桂花蟹肉炒魚肚7. 頭抽蒜片煎生蝦8. 金沙蟹粉扒脆皮豆付9. 咸蛋王蟹肉扒蘭花10. 菠蘿生炒骨11. 脆皮五層肉12. 脆皮咸牛奶13. 家鄉蒸蠔缽14. 鴛鴦水晶飽15. 奶王馬拉糕16. 豬油撈飯x5 17. 菊花蜜x3 柚子蜜x1 ----------------------------------------------------------------------- 跟住講講峰壽司, 之前大獲好評好多人都叫我去試下, 結果今日終於有機會..., 等位當然都係唔少得既環節, 不過好彩我比較早去, 而且又係新舖, 相比之下真係算叫做少D人... 好啦終於坐低食, 發現...WELL....其實真係普通咋喎, 係就係OK大舊既, 但係唔係話特別好味/出色, 可能係我開頭既 expectation 太大, 結果攪到有DD失望... 個人覺得啦, 呢間野我都只係會去一次Only.., 老實講比我揀我去番元氣好過....

被耍

又話有得升..., 今日同我講話上面D人耍哂太極... 有時真係覺得你俾得太多希望我, 到頭來好多野都兌現唔到... 我發覺我真係唔記得左你都係一個老Sales... 我知你盡左力, 但係.., 現實真係完全唔同... 嚮呢度年半, 真係學左好多野... 人性既真偽, 老細既面色, 上左好多好多課... 我....會努力搵工

25/3-26/3 F8 澳門遊

約左我估都幾年, 終於約得成成班F8去澳門玩~~~~一早起身就去左信德食早餐, 興奮地上Turbo Jet 去澳門~~~ (沿途少不免同駿駿傾下澳門賭業, 信德船務等等) 過到去先係12點左右, 諗住未有得番酒店就索性去醫肚先, 諗住去船屋啦, 點知竟然FULL左, 要BOOK先有位...真過份, 假期D人多到呢 =_= 跟住行多幾步去前面個間叫內港既, 叫左D野食, 食葡國餐, 哈, 個waitress幾靚女, 成班友仔係咁撩人~D 野食都幾好食, 不過等左好耐, 攪到我地係咁食麵包, 食到飽哂, 又開左支紅酒飲~~ 飽哂之後就番酒店, 又係去皇都, 之前同IE既同學仔去過, 裝修左, 靚左好多, 樓下仲有埋個摩卡角子機賭場添~ 我地渣渣臨放低D野就出發去議事亭行下, 不過好似個過程好hea咁, 哈, 大家都可能食得飽飽地又眼訓...亂咁行終於到左, 但係勁多人, 想食紅豆餅都要排長龍, 結果又係無排到.., 去到大三巴, 影左D相, 然後就去左食雙皮奶,之後就去左乙水仔... 點知好早就到左, 但係我地BOOK左食8點既誠昌, 唯有四圍hea下, 但係勁大風, 攪到個團好似忽然間無哂MOOD咁, 係咁食風.. 卒知屈誠昌個老闆娘俾我地早D入去食, 叫左水蟹粥, 鱔等等, 但係鯪魚球就沽清, 可惜 =_= 總括黎講都叫做好食既, 不過就好趕咁囉, 假期旅行就係麻煩少少... 夜晚我地去左葡京, 又去埋金沙, 但係都主要係睇, 玩下角子機.., 金沙300蚊舖好似貴左D... 之後四圍搵洗頭水同沐浴露番去沖涼, & Then就番去酒店lu..嚮酒店鋤左成晚DEE..., 4點幾先訓... 第二日好似精神番DD咁, 一早就仆出去(其實都12點), 去食保記咖喱牛腩麵, 嘩, 勁辣, 無乜特別..=_=行多左陣, 買埋煙, 去左睇防空洞, 算叫做景點啦, 坐埋吊車上山, 影左D相, 吹左下水, 四圍行下之後就又番乙水仔去食翅, 勁多勁多人, 諗住去睇下有無豬扒包食, 嘩, 條隊長到你都驚...唉~~唯有寄望D翅好彩我地入到去2點半左右, 過哂食飯時間,先唔駛等位有得食,叫左個翅同D小菜.., 比想像中好, 正~~~ 哈 食飽去左希臘神話, 大家睇左一輪都有賭下錢, 幸運地我都有少少贏, 嘿~~& THEN 就去食晚飯, 去左一間意大利餐廳, 嘩, 唔知點解大家HIGH哂....食雪茄, 飲白酒, 食意大利菜, 吹水傾計, 食甜品..簡直Quality of life~~~~ very nice 成個trip最滿足係呢餐, 哈哈~~ 最後我地過埋碼頭個邊買手信, 就番番香港, 結束兩日一夜既澳門之旅lu...番到去就CALL的番屋企...勁累...好彩第日唔駛番工...

澳門遊

25,26/3 我地成班F8去左澳門玩, 今次真係得8條佬, 哈, 一樣咁正~~ 不過第一日唔知仲乜成班都無乜mood咁, 無planning, 攪到玩得好頹, 哈哈, 第一日食左萄國餐, 誠昌水蟹粥, 當然仲有其他小食 第二日好番好多, 有番planning, 仲有賭錢, 又有得贏, 哈哈, 不過睇左好耐先bet, 好好彩一野就中~~~ (待續)

三月聚會

18/3 又係F8每月例聚, 今次去左火炭泰源, 我既強烈推介, 哈~ 因為之前住宿成日都去... 今次去到當然又係屈佢兩窩雞粥, 再加兩個送, 哈, 正~ 我同肥偉揀送, 結果叫左最多個個餐, 有14個送, 再加埋送既4個, total 18個...嘩, 勁激動.. 點知佢再加多幾過黎, total 成廿幾碟...飽到我地都食唔哂.. 不過臨尾欏個蛋糕出黎.....又係照清..., 哈, 我地呢班都真係算係蝗蟲~

話說星期五晚飲野.....

又講起D買車買樓既問題.... 車.....渣過真係會上癮, 只會想越渣越靚....我真係開始 addicted to it.... 樓.....我地為左租定供拗左好耐....講真真係各有各好, 各有各唔好, 始終將來既野大家都唔知, 呢一刻我話租好, 但係遲D又會走左去供..., 真係話唔埋... 呢D問題...暫時都未逼切既.....都係...唔好諗咁多... 總之都係 Enjoy the life 就得 : )

又番中大影相

今次係陪阿傑皮爺KATHY細JOYCE同阿JOHN影, 都算做幾正, 雖然人少少, 但係影得幾開心, 有講有笑, 仲有阿傑隻狗仔同人地相認既故事...哈哈, 都幾攪野... 有D遺撼就係識唔到D妹妹仔囉, 真係....唉唉~~~ 其實最掛住都係 NACAN, 今日去到見到經理又即刻醒左隻雞脾我食, 哈哈, 雖然我都有order埋個tea set, 但係真係好豐富, 雞脾凍OT+豬扒雙旦烏冬承惠HK$16, 嘩, 嚮邊度搵, 呵呵~~~ 今日渣車行錯路.....不過覺得手車真係開得幾順, 係泊位要練下... 總括黎講今日幾好FEEL~

買左兩本書...

<<證券分析實踐 - 從香港經驗認識國企前景>> 林森池 著 <<一個投機者的告白>> 安德烈‧科斯托蘭尼 著 比心機睇~~學多D野~~

曼聯和波 =_=

夜晚約左佢地黎睇波, 開左支紅酒, 曼聯和波....阿狗同車狗都贏....唉...=_= 又俾車仔拋番開啦....聯賽冠軍幾乎無望..., 最慘係和嚮水晶宮手上.....Really shit..... 無乜心機底下叫自X練下車, 哈, 車完肥偉同胡炳之後到佢自己番黃大仙, 哈, 點知去到龍翔道有Road Block, 哈哈, 佢竟然唔理差佬指示照行, 雖然都係行埋一邊, 但係嚇死D差佬.... 俾差佬發現佢係雪藏牌, 吹兩句水叫佢咪嚮咁多車地方練之後都放我地走, 哈, 不過不失為一個幾搞野既經歷~~~~

見工....

4/3 係 Annual Dinner, 第二朝星期六都要番工, 仲要係好多瑣碎野做...個人又病病地....好唔開心..., 令到我對下晝既 Interview 更加期待.... 滿懷信心下晝去Citibank Recruitment Event, 申請 Citigold Relationship Manager 一職, 基本Qualification我絕對夠, CFA Level 1 仲唔殺哂~? 頂.....唯一係爭經驗, 有 sales 經驗都唔夠, 要有係 investment/insurance/wealth management related 既先得... 佢叫我做 BDE..., 真係要由零開始??? 好憎 Roadshow 喎..., 呢一刻都係未接受到.... 唔緊要, 你唔要我會係你損失!!!!! 之後過埋Citic Ka Wah Bank, 佢地幾睇我既 experience, 不過覺得我唔係咁o岩做 mass market 住, 做SME會好D, 用番 existing 既 client list..., Well, 做SME會係點呢??? 之前未諗過架喎...., 好似做 mass market 會普遍D, 但係我識唔識做呢??? 唔...一時間又 arise 左好多問號.... 有個少少既感覺..., 係咪要搵 HSBC 入去欏D經驗值先去升 LEVEL 呢? 係咪都係等埋有無得升職先呢?? 仲係咪做 Sales 呢??? 搵野讀要讀D乜呢??? 好多問號.....要做好多決定.....

Pass 埋 LE Paper 7

無乜感覺....因為考之前一兩日先知我其實唔駛考都得... 不過都好既, 都叫做一個証明咁囉... 但係個成績無上次咁好, 可能因為今次真係有D dum dum check.... Paper 1...幾時KO佢好呢?

Rayo哥終於收皮...

我相信我地條TEAM會Work得好好多...

TST Gateway Rice Paper 試食記

今晚同 Jack爺, Becca同 Yvonne去左尖咀Gateway既 Rice Paper 試菜, 間野個FEEL唔錯, 裝修幾好, 幾有氣氛, 不過入到去見到佢張酒精tissue係美心牌硬係覺得有D degraded 咁...怪怪地, 格格不入咁... 不過都幾認同其他人講話情侶去幾正, 不過要揀window-seat先爽, 或者坐出去露天個度都得, 但係要揀天氣, 今日陰陰濕濕就都係嚮冷氣地方好D...... 吹左輪水終於點左菜, 分別如下... 1. 香草蟹肉沙律 2. 蝦, 馬蹄蒸粉卷 3. 脆華雞/水鮮菜絲, 青檸, 很多香草 Rice Paper <---個名真係咁架 4. 蕉葉燒魚, 三汁 <--- 又係咁架 5. 香檸茄子牛肉椰香飯 6. 雪糕香蕉布甸 菜色整體上黎講我只能夠用特別去形容, 味道的確無乜驚喜...沙律質數尚可, 粉卷都OK, Rice Paper 就係要自己用米紙去包既, 幾特別, 但係我地懷疑佢係欏錯左第二隻俾我地, 不過我地都無點理, 因為有D "金不換" 葉, D味....個人就覺得麻麻... 至於碟魚, 哈, 竟然係紅杉魚....估佢唔到, 味道普通啦, 至於個飯其實唔錯, 不過就頗為細碟... 全晚最正我估係個雪糕香蕉布甸, 冰凍雪糕嚮頂, 下面係熱香蕉蛋糕再加D香蕉汁同花奶嚮旁邊, 由上至下一次過CUT黎食, 感覺唔錯, 絕對有冰火既感覺, 哈~, 算係全晚最有驚喜... 不過無試到French Kiss, 據說係幾正的... 整體黎講呢間餐廳去一次夠哂數, 試下係唔錯, 但係再去真係諗唔到有咩特別想試... 全晚黎講4條友每位12X, Acceptable啦~~~ 報導完畢

回顧下...

今日執執下野, 欏番本紀念冊出黎睇.... 睇番好多以前人地俾我既 Comment, 發覺自己都改變左好多... 希望會係好既一方面啦, 哈~ 不過 Anyway 我而家有好多好兄弟, 好朋友, 好知己.... 人...要知足~ 想當年中學D經驗真係好深刻, 不過從另一方面睇, 全靠佢地俾左一個咁 "好" 既經驗俾我, 如果唔係我今日既環境可能仲 worse..., 哈, 唔通要多謝佢地????

考埋PAPER 7...

之前D計劃都算做有少少Advance, 終於考埋 HKSI Paper 7, 照計都應該Pass既, 不過老實講都唔知考黎仲乜, 因為考之前幾日收到消息話 Pass 左 CFA Level 1 唔駛考 LE Paper 7-12... 頂..... 不過算, 多多一樣野証明自己係OK都好... 但係, 夠竟有無用呢???? 呢排有一個念頭, 就係好想辭左而家份工, 專心讀書又好, 專心搵過份工又好... 始終覺得有份工嚮度好鬼困身... 雖然老細已經俾好多自由我... 但係我就係反而覺得對佢唔住而攪到有D唔好意思咁... 好似好想讀多D書考多D試... CFA..., CFP..., Master, Law , MBA, 好多好多.... 我係忽然間想讀定真係長遠想讀??? 我都唔知....哈~ 千奇唔好問我想點, 我都唔知.....

初二

今晚無無聊聊Ad hoc 地又同F8班友仔去左碌LING~~ 但係得六條友, 哈, 反而剛剛好~~~ 夠坐車... 渣車兜哂肥偉胡炳自X細龜, 加上肥旭自己去, 我地全部去哂奧海城度玩~~~ 都唔算平, $46/hr 仲要$10租鞋, 不過見識下點都要, 哈~~~ 玩左3 ROUND, 都係普普通通, 始終未練熟啦, 唔緊要, 都係第3 次玩o者應該, 唔熟正路, 都係要交下學費~~~ BTW, 玩完都成兩點, 結果渣車去佐敦搵野食, 哈, 正, 本身諗住食腸粉, 但係未開, 去左食D宵夜店, 食左生炒骨, 肉餅, 排骨鳯爪飯同o者o者雞, 都唔錯, 傾番原來識左10年, 講番讀書D野.... 始終都係讀書個陣最正....唔知我地10年後又會係傾咩話題呢~??? 哈.... 我地仲諗番好多我地只係食一次識味就唔再去既地方, 原來呢幾年黎我地剩係飲飲食食都去左好多地方..... 今晚好正....真係不能以筆墨形容.... : )

工作讀書考試...

做左一年零三個幾月, 老細話會Propose 升我職加我老com同人工...好希望呢個係事實, 始終呢個moment $$$ 都幾重要... 雖然前途既野一樣重要... 不過老實講, 轉左玩dealer business之後見識係多左好多, 接觸既野亦都多左好多, 不過久唔久都仲係諗緊自己做sales係咪做得好..., 個觸覺好似重爭DD, D 技巧都仲係要練下..., 呢D似乎都係無得依書直說, 都係靠自己練番黎.... 呢期成日想轉工, 主要都係好唔妥老細個老細, 正一仆街, 簡直係唔想幫佢手, 雖然我都係為五斗米折腰... 好想試下其他野, 睇下自己得唔得, 另外就係嚮呢度個感覺好二奶, 成日俾人忽視, 好唔鐘意... 讀書方面, 真係唔想浪費時間, 我要進修.....進修.....進修..... 好多野都想學, 希望......有人收我, 哈~ 不過之前有好多試要考..., 我知我絕對應付得黎..., 我最大敵人都係懶... 點樣可以打低佢.....哈

新年快樂~~~~

雞年到左lu ... 即係話今年就二十四歲仔啦..... 睇D運程預測話今年犯太歲, 多變動... 會轉工, 會搬屋... 哈, 我想架, 會唔會預計埋會換車添呀~? 轉工, 唔...老問題黎, 想講, 但係又唔想多講... 搬屋, 究竟3房好定兩間屋好? 又唔知 換車, 哈, 呢個最開心..., 換邊款好呢~? WELL....係咪得個諗字呢? 今年特別想學業進步..., 希望我把持得住, 把握時機, 努力向上.... 我係一個叻仔~~ 哈哈

IESOC & Fans Gathering

今日係IESOC & Fans Gathering既日子, 慶祝JACK爺生日之餘亦慶祝Becca回歸香港......幾個月咁大把~ 哈 約左入大尾篤BBQ, 點知今日天氣真係普通, 整日都落住毛毛雨, 渣車入左大埔, 車埋邦邦, 結果都係決定唔去買野, 入到去搵D自助BBQ, 因為有瓦遮頭, 好彩ALEX做定功課, 欏左D單張, 見D野食同價錢都OK, 就去左個度食...叫做 "大尾篤燒烤王" ... 入到去我扮哂出去接Raymond, 閃出去接埋Rebecca入黎, 哈, 好彩都俾到個驚喜阿JACK佢地, 事關之前夾定唔話俾大家知Rebecca番黎~~ 哈, 都算係幾過癮~ 今日成日個氣氛都幾好, 真係一件好事, 希望呢班人可以再好D... D野食都唔錯, 我地仲玩左一陣踢毬, 不過黑得滯玩唔到.... 燒完野食出左去食Rainbow, 佢地都覺得唔錯, 咁我都叫無介紹錯, 哈哈~~~ 今日個感覺幾好, 仲有手信收, 嗯~~ 不枉我都約得幾辛苦.....呵~

一窩蜂...

友人跟我說, 身邊的朋友都考一樣的試...一樣的Financial related 的試.... 是熱潮, 是真的有用, 還是其他原因??? 總是覺得一窩蜂是不好的社會表現... 或者係我包拗頸... 雖然..., 我都會去做..., 但係我係有目的的..., 我係知道自己想點的... 努力...

Pass左CFA Level 1

心情.....興奮得難以形容 : )

俾番個Planning自己先...

黎緊要面對既野有.... 1. GMAT <--- for Master 2. HKSI Paper 7, Paper 1 <--- At least complete it 3. IIQE <--- 考慮中 4. Master <--- for change field 5. CFA.... <--- 未知 Pass Level 1 未 不過如果繼續做sales呢??? 頂....點解我個人咁極端.... 兩樣野可以咁無關係....??

Sales VS Investment

依然係嚮呢兩個職業度掙扎緊.... Investment係一個我未知既世界... Sales 係我現在處於既世界... 永遠都有不滿現狀既感覺... 但係又要記住身在福中要知福... 其實真係好ENJOY而家四圍去他他條條既生活... 但係出糧個下...原來一樣可以係唔開心...或者唔好用唔開心, 係唔滿足... 我認我貪心..., 我要改善生活... 我相信.... Quality of Life.... I Like it...

恒生2nd Interview

有幸有得去2nd In, 要預備一個presentation講下點樣去enhance investment service business既market competitiveness ... 剛剛去完旅行番第日就要IN, 全靠阿哥幫我做左唔少準備工夫, 可惜個人今日狀態不佳, 唔舒服 + 唔夠訓... 無乜精神, 腦又轉得慢D.. Presentation當然OK可以接受, 但係Q&A session就好似暗湧左少少... 其他candidate又唔弱.. 呢Round真係好似有D暗湧咁... 希望大步跨過啦...., 祝我好運Again!!

台灣之旅

真係好正好正... 難得係9個人都玩得咁開心, 咁ENJOY, 呢D機會真係好難得... 多謝每一位帶俾我一個咁開心既TRIP.. 希望之後仲有機會咁多人一齊去旅行玩~~ 我地發現只要咁多人一齊, 去到邊度其實都唔緊要, 一樣會玩得開心... 就算睇景點, 我地都可以好癲, 哈哈~ 今次旅行無寫遊記, 但係睇番每一張相都會諗番好多開心野 : )