新春首仗報捷!!~

雞狗二年之間, 屋企黎左一場轟烈既四方城大戰~ 側聞肖蛇者於狗年財運亨通, 命運安排兩位肖蛇者對坐, 其餘挑戰者分別肖雞及肖牛~ 結果, 四回合過後...... 肖蛇二人大敗而回~ 肖牛者取得凱旋而歸~ 肖雞者(小弟)則小嚐甜頭~~ 期待下次再戰~ 多謝多謝~ 另在次恭祝各位狗年身體健康, 橫財就手, 生意興隆, 步步高陞, 學業進步, 心想事成, 事事順利~ 恭喜恭喜!!!

朋友的選擇 --- 669創科實業

669 創科實業 單單看圖, 我相信我的朋友是在前一個交易日大跌巿中入貨的... 不過...., MA 全部逆排, 成交上升股價下跌, 各種利淡因素集而一身... 結果..., 今朝開巿前宣佈停牌..., 涉公佈股價敏感消息..... 至少, 我會相信有其他更佳的選擇..... 希望我的朋友好運, 希望我睇錯~~~

誘惑...

原來外間既誘惑真係好犀利, 真係搞到我呢排個人一得閒諗野就會諗番起... 機會原來真係大把, 個巿原來真係好好景~ 不過都係Jaa 爺講得o岩既, 後生仔, 捱下先啦, 唔好成日諗住轉!!!!! 但係, 不論公司名/人工, 都好吸引 : ) 雖然呢度又有佢值得留戀既地方!~ 哈哈, 真係難決擇...~

I Love you, KOBE the 81!

Kobe Bryant 個人獨取 81 分! 帶領湖人於23/1/2006以122-104戰勝速龍.. 創造歷史性紀綠~ Are you serious?? Yes, I am serious!! 你話我獨食?? 我獨食得起!! I Love this game!!

巿道好轉??

有無咁Q多人呀.., 前日琴日一連兩日都光顧左有番咁上下規模既酒樓食飯~ 嘩, 人多到呢, BOOK左位都唔代表你一黎到就有位, 起碼要你等番半個鐘先至安排到你坐低, 再加上等候大堂D人密到插針都插唔入, 老實講, 係咪過份左少少呀....? 兩次都係一早就訂左個套餐, 一坐低就即刻同你上兩碟菜, 好似要快快上哂D菜趕你走再做下一輪咁, 我心諗, 我地八點幾先至開波食, 你係咪仲趕得切做多一輪生意呀?? 真係一個唔係咁好既經歷, 我實在太唔鐘意一班人食飯要趕頭趕命, 好似打仗咁.... 不過.., 見到咁既場面, 係咪真係意味住經濟巿道好轉?? 如果係真既, 消費上面會唔會唔再慳住慳住, 而係大手交易?? 如果真係咁, 香港可能真係會再好多三五七年.. 零六年, 會唔會真係咁好呢..?? 我既零六零七預言唔知會唔會出現呢...

出外靠朋友

邊個話無直版銀紙換? 你識朋友就幫到你~ 邊個話Mort Loan個利息貴? 你識朋友就幫到你~ 邊個話定期利息低? 你識朋友就幫到你~ 邊個話無生意要愁? 你識朋友就幫到你~ 份件唔識做點算? 你識朋友就幫到你~ 朋友多~ 真係好好多!! 多謝各位幫過我既人 : )

Kick Off

Unofficial Kick Off 左... 開波要做野, 原來真係會有壓力~ D同事都傻傻地既~ 睇黎我都係時候做番D野!~ 如果唔係, 下年我又會嚮另一間公司架啦~~~

反思 - 跳出框框

今朝一早睇完原是物語, 有以下感想... 文中提及孔少林中學時的美術老師常常指導他們要打破傳統, 天馬行空, 他們參加美術比賽時做了一尾大金魚, 而魚尾飛出框外, 最後憑這個『跳出框框』的意念得到了全港冠軍... 睇完全文即時令我想到上星期同同事傾開佢仔女讀書既問題, 我地異口同聲地同意, 經過香港教育制度既洗禮後, 都認為如果有錢, 一定送自己子女去外國讀書... 究竟係咩原因令到我地對香港教育咁無信心? 定係外國月亮硬係圓D? 我只係覺得嚮香港讀書, 你永遠就係不停吸收, 永遠將老師同書本講既野照吸, 當中極少加上思考, 變左你話乜我信乜, 只要信就不要怕.., 每個學生就不停將自己當做機器咁讀書..., 好啦, 唔讀書就被標籤為壞學生, 無前(錢)途等等.. 結果就做成好多只係識讀書既書獃子, 非書本上的免問.. 又有另外一批比較醒目既會順住要求去做, 我地稱為 "exam-oriented" 為考試而讀書, 考完可以話係99%唔記得, 讀完, 又係唔知做乜... 嚮我地經歷呢D階段後, 對香港教育都怕怕... 而且而家學生入學講求 "乜都識", 美術音樂舞蹈跆拳空手足球游水棋藝演講天文地理科學政治經濟最好樣樣都識, 一方面造就不少學童教育公司, 一方面卻苦了小朋友.. 又見到有D家長唔俾子女睇電視, 慌死個仔學壞, 叫個仔去讀古文, 四大名著等等, 到到我地呢個年紀, 一定會俾人問 "你個童年去左邊??", 到時個仔女先識得後悔... 如果仔女真係鐘意都還可以, 如果唔鐘意, 第時就只會埋怨父母無同佢地安排最適當既野... 或者.., 還小朋友一些自由可以嗎?? 俾佢地有自己既想法, 等佢地破舊立新, 跳出框框, 可以嗎??

成功踩車

正所謂天有不測之風雲, 我地呢個 IESoc&Fans同學會不下數次嘗試攪踩車活動都撞著落雨甚至打風而令活動改期, 嚮一改再改之後, 琴日終於成功完成到我地呢個踩車會!! 節目嚮朝早開始 (其實已經12:30) , 我地先去飲個早茶, 都係每次必有既節目之一, 去左新城巿隔離間酒店下面間麗都, 食飯黎講無乜特別, 只係大家都好有避忌唔敢講落雨之說~~~ 食飽飽, 大家再確認天氣都應該無乜問題, 之後就去左租車, $50蚊一日, 叫做OK啦, 可惜無得嚮大埔還車, 爭少少方便~ 大家揀o岩車, 試下行下又兜下圈, 等齊人就出發~ 好彩無耐之前嚮Josephine屋企踩過下, 今日再踩都無話唔識平衡, 總算唔太失禮啦, 不過開頭都唔可以玩單手, 踩踩下先可以講住電話踩~~ 我地順住條路踩入大埔, 我估可能因為今日天氣都幾好, 成條路都好很多人, anyway 熱鬥D都OK既, 個半鐘多D, 就踩到入海濱公園~~ 嚮公園旁邊主要都係睇下人地放下風箏, 我地又做埋每個旅程必要做既野 (影相), 之後hea多陣都回程... 回程就頂囉~~ 俾阿A君打黎吹左陣水, 攪到我行錯路, 兜左個圈, 仲要問人人地又帶錯我行, 行番正路已經唔見哂佢地, 唯有出盡力踩..., 臨尾真係累到踩唔郁咁滯!!~ 踩到半路都係去番間船士多食魚旦飲綠力, OK啦, 可能累到食乜都無所謂, 食左少少抖左陣就捱埋回程條路.. 之後當然就係搵野食, 估唔到6:30 成個新城巿所有餐廳都要等位, 真係啤一聲~~ 結果ALEX搵左間新開既餐廳, 嚮大家都無所謂既程況底下照入去坐, 俾左個U形卡位, 都叫舒服既, 見餐牌野食又唔係太貴, 開始亂叫, 點知.... 絕對叫做有驚喜, D野食基本上黎講真係唔錯, 雖然有少少可能因為太累, 變到食乜都無所謂, 但係, 整體上都叫幾好!!~ (新到openrice都未有link, copy唔到.., 間野叫紅葉 Maple, 嚮好運中心舊好運葡國餐廳)~~~ 食飽, 吹水, 之後就頂唔順番屋企, 睇埋勁歌再睇車仔就訓lu~~ 總括今次旅程的確唔錯, 不過可能太耐無做運動...削左 =_=

溝通能力

出黎做野, 真係覺得溝通能力對一個人成唔成功真係影響好大... 我身邊有D同事我個人黎講其實都覺得佢係好有料, 可惜就真係衰在表達能力差, 溝通能力又有問題, 變左好多時佢想講既野根本表達唔到俾其他人知, 就算話想教人做一D野, 都攪到將D問題復雜化, 實在係好大問題!! 幸好我對自己既表達能力同溝通能力都尚算滿意.., 當然未去到演講級, 但係至少So far 我想表達既野人地都知人地都明... 說話能力.., 絕對係我畢業後其中一樣我自己好想去 Improve 既野.., 實在對做Sales, 甚至做人同與人相處有一個好大既作用!!

書到用時方恨少...

唉, 真係後悔點解當初唔勤力D讀書.... 勤力D, 一切原來都可以再好D... 唯有而家比心機面對將來所有既野!~

唱Karaoke

話唱K話左好耐...同各方好友結果都係無唱... 今日, 終於有機會唱lu~~ 話說今晚Team Building成Team人要出去唱歌, 結果Lunch走鬼左去Neway練歌, 最尾都係揀左唱紅日, 全個過程就不停咁紅日, 真係睇楊采妮都睇到驚....之後食埋Lunch, 練左陣, 2點左右D同事都開始走... 但係~~~我就同另外幾個同事靜雞雞留番嚮房繼續唱~~ (當然唔再唱紅日啦!!!!), 嘩, 真係一騷多月未唱K之癢!!! 爽!!! 仲要我地臨尾唱到差唔多3:30 先番番Office~ 因為老闆生日, K房送左個蛋糕同香檳俾我地, 我地番到Office 之後又切埋蛋糕同飲香檳...真係無得頂... 玩下玩下又四點幾, 坐多陣就過中環Team Building.., 又一餐免費晚餐!~ Wonderful!~

網誌~

忽然間發現原來好多人都開始寫網誌.... 哈, 好彩我嚮年幾前已經開始寫, 今云仲唔潮番一次~? 呢排好鬼忙, 知道個Blog有問題都無時間理自己個Blog.. 睇怕都要等禮拜尾先搞一搞...

2006 年小弟目標

做完個2005年回顧, 嚮開工前就SET番個2006年目標啦~ 1. CFA Level 2 希望順順利利 Pass, 之後再成為 Level 3 既 Candidate~ 2. 希望有學校收我讀 MSc of Finance 3. 繼續學金樓股匯債既研究 4. 盡量嚮呢年內唔轉工 5. 去一次旅行 暫時諗到咁多先, 遲D再有就加上去 : )

2006年不負責任經濟預測

等小弟嚮呢度, 做一個不負責任既06經濟大預言先~ 1. 樓巿 整體社會都預期06年3月貝南克上台加多一次息之後美息見頂, 香港息口亦見頂云云, 隨之而來就一定係樓巿蓬勃等等... 不過我呢D包拗頸!! 我預言息口見頂後樓巿會再略有升幅, 其後隨之而黎就係慢慢回落, 息口見頂後買樓既人, 我祝福佢地唔會變成負資產!!! 以上係基於我既理論, 息口升樓巿升, 息口升完樓巿回落既 Theory! 2. 股巿 普遍睇好各中資股, 尤以銀行股及電訊與電訊設備行業, 主要原因基於06年兩隻大型銀行股IPO及內地3G落實計劃, 呢兩點小弟亦都非常認同.. 至於原材料, 石油, 等等, 小弟並遍睇淡.. 至於本地股巿, 預計今年都係缺乏方向, 恒指都係有波幅無升幅多., 預計年頭應該會有某個別類型熱炒股, 到年中開始冷卻, 上半年股巿應該向好, 下半年以反覆偏淡為主. 3. 匯巿 匯巿上, 預期美息見頂後美元會有一次重大回落, 及後將重拾升軌, 預期日本最快於下半年先會再考慮開始加息. 06 年上半年仍然會以套息活動為主, usd/jpy, aud/jpy, nzd/jpy, eur/jpy 上半年應該有唔錯回報, 下半年, 比較難預測! 4. 金巿 唔識, 希望06年我會學識分析 其他預測: 預期06年下半年至07年上半年, 香港經濟未必會好, 依然相信06年07年會有大事發生睇淡香港樓巿股巿, 小心會有泡沫爆破, 尤以美國樓巿為甚, 其後香港必然跟隨.. 下半年投資必須審慎, 小注慢慢吸納並嚴守止蝕為上策, 可以選擇留意對沖基金既動向, 於逆巿往往表現為佳~ 另外美國貿赤會靠人民幣升值得以舒緩, 美元並唔會因此而大跌~ 暫時係咁多, 還請留意上述乃係不負責任之預測, 有錯當學野, 有o岩就等我下年認下叻先~

2006年既頭兩日...

我都通左頂...哈哈~ 太多野未做, 希望今日會完成番啦~~~ 新一年, 努力努力~ 盡快搞掂埋個 2006 前瞻先~