終於開左口...

經過多方面既諮詢, 今日終於同左現任老闆講我會轉Dept. 其實apply係好耐之前既事 (都已經成兩個WEEK), 但係到今日我Confirm左我D野過到HR度先同佢講, 某程度上佢都會覺得我唔係咁俾面佢.., 因為攪到佢差唔多係最後一個先知.. 但係我又有咩辦法?? 邊個叫你之前唔幫我手搞轉Dept, 我真係覺得你唔怪得我, 我梗係等我條後路Plan好哂先知會你啦, 話哂又唔係識左好耐, 你又俾唔到種感覺我你係會幫我諗..., 你估我唔驚你會叉隻手出黎阻住我做野咩?? 我都要為我自己著想下架嘛... 可惜啦, 我相信你都未必相信我可以嚮咁短時間搭通哂各條路~ 等你仲話我建立關係要改善?? 話哂呢樣係我自己幾 proud of 既野, 我好想話俾你知我唔係剩係得呢一條路添呀, 我仲有多一條後路.., 你睇下你令到我幾咁唔鐘意留嚮度?? 雖然都未必可以怪哂你, 始終都係呢個Dept既nature令到我要走既, 不過你既supportive既程度都係其中一個幾重要既 Factor.... 到我今日同你講既時候, 你都仲要話點解點解, 當然我都好明白你站在既立場唔可以太負面, 但係我都覺得你太唔了解我啦掛?? 我真係爭在未白紙黑字寫出黎o者, 同你講都講過起碼兩次啦..., 邊個叫你乜野表示都無.. 等埋星期一就可以 Confirm 係咪走得, 轉到過去會係一個新開始, 希望可以操到自己勤力番D啦, 呢三年..., 我真係太懶太懶了.... 多謝幫過我既人, 不過, at this moment 我仲有D野收埋緊.....且看故事發展如何...

Commitment

AT LEAST one-year time!

西班牙輸了

今年世界盃特別鐘意西班牙, 雖然隊波擺明係無冠軍相, 托利斯當然係其中之一個因素, 但係最主要係覺得隊波中前場真係好多天才橫溢既球員.... 可惜.., 最終嚮16強不敵法國出局... 不再評論超前那球是否錯判, 輸了便是輸了, 不要再抵賴, 但是來屆不輪歐國杯還是世界盃, 我還會對西班牙有一定的情意結... ( 或者因為英格蘭已沒有驚喜和新鮮感了 ).... 托利斯, 韋拿, 法比加斯, 祈待你地再放異彩~ 我會繼續支持～

阻力..

呢排身邊其實都發生左幾多野, 係幾多需要用個腦去分析再去諗既野..., 有關於呢個Market, 又有D係關於自己... 但係唔知點解嚮寫寫下既時候, 臨尾都擱置左.. 有時係因為覺得自己寫出黎既野太白痴, 唔敢POST出黎.. 又或者係覺得自己寫既野可能太片面, 分析得唔夠詳細.. 又或者有D直頭係唔出得街....所以寫左, 知左, 發洩左又由得佢算數... 我甚至係俾個藉口自己賴落世界盃度.., 因為世界盃令自己夜晚既時間唔夠用... 唉..., 真係越黎越覺得自己識得俾excuse自己..., 實在...實在實在一定要戒左佢... 1., 寫左出黎既野就算唔post都要save起佢先 2., 就係因為唔夠全面所以先要練 3., 唔出得街既....., 就....再諗辦法啦! 好..., 努力~

疫區...

公司呢期好多人病, 變左一個疫區... 而我....嚮琴日開始都成為病患者之一.... 琴日晏晝開始覺得頭痛, 晏晝番左屋企抖, 訓左成日, 夜晚個人仲要沾寒沾涷, 開住冷氣訓但係成身出冷汗...好鬼辛苦.. 結果波都無睇就訓左, 今朝訓醒好似好左D, 但係就開始腸胃唔舒服.. 次次都係咁樣..., 唉~~ 病真係好鬼辛苦....

學以致用

當你發現你自己學過既野係有用, 而且又用得著嚮工作之上..., 個感覺真係唔錯... 但係當你發現你學既野嚮工作上極少用到...., 個感覺真係好差... 我究竟係嚮邊個 Stage 呢....

IESOCnFans 聚會

說是 IESoc and Fans 的聚會, 不如說是我, Yvonne 我 NJ 考完試後的聚會, 因為呢個先係我今次約食飯既出發點... 其實一個WEEK有多之前已經約定係15/6 的, 不過我到前一日先打電話去 confirm (懶的關係), 結果就變左有好幾位朋友仔都黎唔到....唔緊要啦, 下次我會早少少約 : ) 當日中午打電話去訂位, 先後打過魚一丁, CPK及Dan Ryan, 竟然不約而同地無位!!! 太可惡, 香港經濟咁好咩? 星期四都玩 Full Booking?? 結果又去番我覺得其實都唔錯既 Our Wonderland 食, 一行7人我地order左一個6人餐, 味道算唔錯, 不過奇怪左飲哂湯之後先上包包....有點兒錯左次序囉... 及後個甜品其實唔錯, 有雪糕有芭芙, 可惜當日大家都無帶相機, 環境又相對比較暗(其實是不錯的), 結果就無影低相~ 席間我地傾左好多計, 講下邊個結婚, 講下以前上堂抄功課D野, 竟然傾傾下背番哂中五Chem入面頭20種元素出黎 (真係撞鬼=_=), 又講下 convolution 上左幾多個 course, 講下走堂, 講下邊D professor正PK, 傾傾下, 唔覺唔覺又差唔多11點~ 離開餐廳同Yvonne&NJ步行番旺角, 我就坐小巴番屋企睇英格蘭對千里達, 時間剛剛好~ 最終賽果英格蘭少勝2:0, 其實打得麻麻, 不過可能真係未上力啦, Anyway, 我都係鐘意西班牙多少少, 哈 : )

Ricoh...

已經係第三個 Manager 叫我番去做啦... 我又一次 Reject 左佢... 其實諗諗下, 我嚮 Ricoh 個年半原來係暫時做野黎講算係幾開心.., 起碼有個 supportive 既老細, 同埋D同事又幾好傾咁... 可惜啦, 我自己始終叫做有D夢想/理想.., 正所謂 "一個人無夢想, 同條咸魚有咩分別" ... 希望我呢個決定係正確啦, 雖然放棄既野都幾多. 多謝 Dickson, Frankie 同阿Choi 既 Invitation..

世界盃月

黎緊一個月既時間都可謂非常充實, 差唔多日日都會有波睇, 我呢個球迷當然盡可能唔錯過每一場賽事~ (其實我連法國網球泥地賽我都有追, 拿度真係勁到呢......) 上星期六係世界盃第二日賽事, 我地F8總動員食完6月飯聚之後就上左黎我度睇波打機兼打牌.. 早兩日我都好激動咁去左百佳掃貨, 預備定我地呢個世界盃月既糧草, 總共買左五百幾蚊野, 計埋星期六幾十蚊, 成六百幾蚊零食連飲品, 好彩有送貨服務, 如果唔係都幾甘.... 講真當日D波就麻麻地精采啦, 第二場我地睇左一半都無, 第三場就勁眼訓咁睇 (場波悶其一, 個人眼訓其二), 但係最開心都係玩 winning 既時間, 絕對精采過睇波, 哈哈, 勁激動... 結果玩到五點幾先訓..., 不過真係發現而家極之唔挨得夜..., 以前通頂打機做 project 閒閒地做到朝頭早都毫無問題, 但係而家真係玩夜D個人都覺得好殘... 爆瘡不突止, 個人手手腳腳又好似痛痛地咁, 又唔夠精神咁..., 攪到成個道友咁...真係大檸樂... 世界盃7月10日先完..., 呢個月入面見到我沒精打采咁唔駛咁擔心, 多數都係因為睇波攪到咁樣樣...哈~

低Q能..

都唔知你條友咩心態..., 講到明哂個客係要A同B, 擺到明我地可以Offer到A同B俾個客, 又解釋左俾你知你如果唔係俾A同B個客既話個客會A同B都唔要... 你係都要欏你個C同D出黎 present 俾個客, 結果攪到個客勁唔開心, 嚮度嘈喧巴閉.... 佢梗係唔會嘈你啦, 你老細嘛, 咁咪嘈左落我度囉..!!! 好彩我同個客o岩咀形sa哂lum..., 不過都唔知單生意搵唔搵得番番黎... 我事前做左鬼死咁多功夫俾你一獲過叉喎哂..., 真係頂你... 你少左一個半個客可能覺得無所謂, 但係我一個半個都唔可以少架!!! 根本上都唔係為左解決問題, 只係識得制造梗多問題俾我...., 唔係個個客都受你個套架, 你都要understand唔同情況唔同situation架..! 仲嚮度扮哂野話經驗多..., 我頂!

2778

終於有時間寫下 2778 既感想... 其實繼上次彤叔一招 posion pill + posion put 攪掂 TCL, 一直都覺得D二線地產佬真係好鬼有計, 17號仔如是, 41 亦如是... 今日信報亦有報導, 標題為 "鷹君拆冠君 負債比率降至22%", 文內劈頭就話 "鷹君摸頂分拆冠君產業信託上巿, 錄得特殊收益103億, d/a ratio 由 58% 減至 22%" ... 真係勁, 嚮呢個咁適當既時間crave out, 搵番一畢還債, 上巿至今2778都未試過浮番上水面, 簡直達到哂管理層既目的... 仲記得佢嚮第一日上巿時嚮港交所飲香檳笑哂咁影相D人仲話點解跌都咁開心..., 根本佢就係由心度笑出黎, 分分鐘唔跌反升, 佢仲覺得自己蝕左...~ 2778 出左黎之後, 41 真係反而仲吸引左.... 不過...始終鐘情另一隻收租股多D~ 有時間再研究下佢......

懶...

睇完soso個 Blog, 對比左佢剛剛番而家份工, 同埋而家既心情..., 某程度上原來我地都面對到同一樣野... 或者大家都係一樣, 對一份新工都係充滿熱誠, 滿腦子都係諗住點樣可以做得好D, 放幾多時間心血落去, 希望做到D成績出黎.. 但係越做得耐, 就會發現入面並唔係你所想咁好, 抄錄soso's blog既一句 "太多野做,太少回報,升職無望,加薪泡湯,冇人賞識,日日捱罵,系統無能,人事腐敗," 雖然唔係全部同意, 但係有幾樣野都幾中 point... 係我太無耐性?? 定還是我太過自我... 做而家呢度既客就還好, 做 Staff?? 你發夢... 考完試反而心情麻麻..? 我都唔知自己點解會咁衰格..., 可能真係D問題逼到埋身... 到真係要面對既時候, 唔容許我再放埋另一面.. 呢排諗野又開始負面番? 唉~~ 出面快D動土完畢啦, 心情真係麻麻....

大戰過後....

有點兒反而多左野煩既感覺... 可能之前俾我用黎做逃避既藉口已經無左, 眼前既種種問題都要去面對番... 唉唉...都係逐樣逐樣比D心機黎做啦... 不過希望快D出 Result 啦..., 有D野要 Pend 到出 Result 先可以 Action..... 加油加油.....

抗戰完畢!

希望抗戰成功~ 7月尾有 Result, 期待期待!~ 多謝各方好友對我呢幾個月既包容~~ 係時候搵番D朋友仔食下飯~~