沒有方生孔生, 我的精神餓了...

最主要原因係無左每朝早睇信報既最佳食糧.... 方生及孔生分別去搵佢地既對象, 因此而別去信報, 確實令唔少讀者失去每朝既最佳讀物... 今朝買信報個陣, 好心急想睇下財進才俊版(及後改名了)的半版會係乜.... 可惜...都係已經變哂其他野了.... 希望有日再可以嚮其他地方睇到佢地兩位既文筆, 或者再有其他後浪出現... 信報我仲會支持多一陣, 頂唔順既話, 我都係花多D時間睇番我要睇既書上面lu.... 不過..., 而家欏起份信報, 真係唔知由邊一part起入手... (老曹係好, 不過太長....要慢慢睇先得; 林老先生既就要用腦去睇, 朝早我未ready)

軟硬 Concert

星期三就去睇啦~~~ 超級期待... 外界一致好評~~ 可惜當晚嘉賓係千fa..., 希望唔好太差啦..

不要衝動...

曾經寫左好多好多而家要面對既人既野... 但係諗清楚都係唔好 Post 出黎啦... (不過我Save左做草稿, 不時可以remind番自己!) 嚮呢個社會..., 真係要學識保護自己多D, 防範別人多D先得.... 呢度的確令我學到之前幾份工都學唔到既野!

終於 Confirm 啦...

7/8 我會嚮番中環番工!! (應該唔會再有咩意外啦掛....我受唔住刺激架啦!)

2006年7月16日 上海3日2夜之旅 Day 3

2006年7月16日 上海3日2夜之旅 Day 3 今日訓晏番少少, 因為琴晚飲得夜得滯既關係啦..., 本身諗住約埋肥仔去食早餐既, 點知佢地搞晏左少少, 我地又鬼咁肚餓, 於是我地就落左酒店餐廳係咁易咬少少野先再出發, 首先 check out左先, 同個senior d既 receiption係咁小佢地個 trainee, 我地放埋D行理嚮一邊之後就出發去番百盛百貨等肥仔~ 肥仔遲左少少, 我地嚮麥記等佢, 之後我地就去左食振鼎雞, 原來係上海好出名既小店, 好多上海人都食, 最主要都係賣雞, 雞粥, 麵, 原隻, 雞腳等等, 仲有內臟個D全部都有, 我地係咁易叫左少少試下, 都幾好味, 幾多風味咁啦, 不過其實就麻麻地特別o者.... 行下行下又經過豐裕生煎, 我地食埋D生煎飽, 熱辣辣嚮街邊食, 可能因為夠熱既關係, 所以都幾好味..., 食埋之後我地就繼續出發去搵鐵皮玩具屋買手信~~ 可惜我地開頭行錯路, 仲以為佢執左, 幾驚.., 不過途中經過一間買D甜品既, 叫 "上海哈爾濱食品店" (無錯, 又上海又哈爾濱), 我地係咁易執少少番去俾同事食下咁啦..., 之後又繼續搵鐵皮玩具屋~ 原來我地行錯左方向, 後尾發現左掉頭行, 終於去到啦~~~~ 入面好Q好Q多玩具, 個店主都好好人, 俾我地欏哂落黎玩, 有D正既又介紹俾我地, 我同駿駿都各自揀到手信買番去送俾人, 之後我地都仲留左一陣嚮度玩其他, 有隻母雞生蛋既又好正, 飛機又好正, 好多都好正~~ 我地仲同店主一齊影左相, 欏埋佢咭片, 等我地番到香港都可以上網搵番黎睇~! 玩完鐵皮玩具屋, 買完手信, 整個行程都差唔多, 我地坐的士諗住番番酒店欏埋D行理就準備食少少野閃, 點知坐的士都有特別野發生, 我地親歷一宗交通意外呀, 我地架的士炒左落一架轉緊彎既的士度, 攪到我地要落車再轉過另一架車番酒店, 仲要原來路程超近..., 不過算啦, 反正我地唔識路... 欏埋行埋, 我地坐的士去番南京步行街, 其中駿駿同胡炳又買左少少snack做手信, 不過我就無買啦..., 係咁易影左一兩張相, 就過番浦東個邊正大廣場既小南國hea食野同休息下, 我地晏去到(差唔多兩點啦), 食到成四點幾, 最主要都係不停咁傾計+講笑+食野+飲水, 哈..., 總結下行程之餘又relax下, 非常唔錯... 食埋野我地就坐地鐵再轉去坐磁浮列車去機場走啦, 架磁浮又真係幾快, 7分鐘到機場, 相比我地落TOWN化左個幾鐘真係唔錯, 睇住佢慢慢加速到430-431km, 個感覺都唔錯, 我仲拍埋套片添, 哈哈... 由於鬼咁快就到左機場, 我地又將坐個班機調早左, 好成功地又可以唔駛坐嚮度白等, 我地去duty free買埋最緊要個D野, 嘿嘿...., 之後就上機lu... 不過今晚港龍機唔知仲乜..., 竟然D set dinner無剩? 唔夠同一款派, 又有另一款係辣既, 少人要D, 但仲要派哂, 攪到胡炳想話食多個都竟然話無...真係有點兒那個..., 呢D程況應該唔會出現嚮國泰機度.... 坐左兩個靚鐘, 番到香港lu..., 胡炳戰戰競競出閘之後, 我地就坐番A22番屋企lu.... 整個行程就係咁野~~! 今次既遊記都寫得幾詳細, 哈!!! --------- PS: 成個旅程麻煩哂肥仔既安排同策劃仲有解釋~ 感謝感謝

2006年7月15日 上海3日2夜之旅 Day 2

2006年7月15日 上海3日2夜之旅 Day 2 照舊八點咁上下起身, 梳洗埋就落去食酒店個自助早餐..., 落到去...頂, 無乜冷氣, 野食又少, 不過算啦, 咁既酒店咁既餐廳都預左會係頹架啦...係咁易飲杯橙汁整件多士食隻蛋加少少野就走, 準備我地今日既旅程... 我地坐的士去上海旅游集散中心, 等埋肥仔, 就買package (RMB80@)去朱家角觀光, 原來當地D人都幾勁, 成個鐘既車程照企住逼住上去, 我地呢D hea精當然等到有位坐先上, 終於上到車坐定定我地就開波....訓...~~ 哈哈, 一上車就訓..., 可能大家都唔夠訓既關係啦~ 大約坐一個鐘多少少啦, 就到達目的地, 朱家角係上海其中一個水鄉, 都係睇D小橋流水個D啦, 當中都不乏唔少展館同風景睇既, D風景又真係幾靚既咁, 我地都係係咁易又影下相, 觀光下咁囉, 個套package好似有十幾個景點包左入場費架, 我自己就去哂咁多個, 雖然都係走馬看花, 但係總算叫做完成一個任務啦, 哈哈..其實我地都影左嚮多相, hea 影又有, 團體又有, 行到咁上下我地仲去左坐船仔嚮條河度遊覽下, 都係吹下風影下相無聊下咁囉, 旅行團就咁上下啦~ 行哂朱家角我地係咁易食少少野就坐番車番巿區啦, 當然唔少得又係訓啦~~~番到Town我地去左坐地鐵, 好似去到陜西路站就落車~我地之後嚮百盛百貨都行左陣街, 叫做過下冷河漢下冷氣咁囉, 當然唔少得去睇下我地至愛既酒~~~啦, 哈~ 其實都係類似吉之島個類咁... 行完商場, 之後就行左一條漫長既路程 (我地懷疑俾肥仔昆) 就去到一間好有特色既餐廳, 叫"螢七人間", 呢間野係一系列日本人設計既餐廳其中一間, 主要都係sell concept, sell 新派~ 佢個門口已經好特別, 無招牌, 只有射燈射落地下有個logo, 行完stair上去, 又有機關, 要玩個九宮格既迷語先開到門, 開錯左門仲會有 "gotcha" 俾黎睇黎串下你, 勁搞野..~ 千辛萬苦終於開到門, 間餐廳原來有分飲野同食野, 黑媽媽咁既, 好特別, 上到3樓又會望到出面, 總之個FEEL就好正, 我地叫野食啦, 當然有叫酒飲, 我地飲啤酒, 點知佢個啤酒杯都特別過人(遲D貼相), 隻碟上面又會有D字俾你估番一句成語, 我地剩係玩呢D都覺得特別!! 仲有就係連佢個toilet都特別過人, 有機關先去到(而家都係唔好講係乜lu), 唔識玩既就...呵呵呵~ 呢間餐廳D野食都唔錯, 我地又試一間特色野~~ 食埋飯我地坐的士去新天地, 上去個商場係咁易行個圈, 無乜特別就落番出面D BAR飲野, 揀番間有 chaser feel 既, 叫做老第坊, 可惜都無個陣個感覺啦..., 不過都終於見識到上海有番D質素既女仔, 新天地呢區果然係好D!!! 嚮老第坊飲完野, 四圍行左一陣我地就番酒店lu, 番到上去先發現無水飲, 結果就落去買左個杯麵食, 哈~~~食飽沖埋涼就訓, 準備第三日即係最後一日既旅程lu....

2006年7月14日 上海3日2夜之旅 Day 1

2006年7月14日 上海3日2夜之旅 Day 1 旅程今日開始, 晨咁早起身check一check無漏野就即刻出發, 落去APM隔離買左個腸粉同麥精食, 等埋胡炳就坐A22去機場~ 到左機場拿拿臨check in confirm左係咪坐10:00機飛, 好彩琴晚confirm左, 因為原來架機都幾爆, 成功check-in (當然唔多唔少串下駿駿點解我可以調早一班機啦, 哈), 之後我地就再去左大家樂坐低飲杯野食少少野~ 坐低食野吹水又睇下有咩行程之後就過去坐無人架駛等入閘上機, 成程機其實都無乜特別, 都係食下飛機餐, 睇下報紙, 食下 Haagen Das 雪糕咁, 到落機之前就搞笑, 大家未停機就開定電話, 個個都有SMS收到所以嚮機, 我就較左震機所以無出聲, 但係胡炳就嚮到鬼咁大聲, 俾個空姐埋黎串佢話而家仲未開得電話.., 勁樣衰, 俾人串完之後仲要即刻停左機..., 真係笑鬼死, 哈~ 落左機, 出埋閘, 就出去坐5號巴士直出人民廣場, 緣途基本上都係訓下覺咁, 風景其實都無乜點睇, 到左人民廣場再轉的士我地就到左落腳既華美國際酒店... 間酒店..., OK啦, 預左唔會話特別靚, 但係點不知個reception trainee 就真係勁頹, 講野細聲又快, 完全唔理會我地係遊客, 而且D野又唔熟, 我地明明俾哂錢都仲要我地俾多次黎做 deposit, 屈左我地 $1500 cash, 真係頂佢... 番到房我地settle一陣就同左肥仔會合啦, 執一執行裝就正式出發~ 我地嚮酒店一路行, 經過上海老街, 想食豆腐花但係無涷既, 結果無食, 慢慢行過D橫街少巷就到左第一個景點--豫園~ 我地都係四圍行下影下相, 但主要我地都係頹頹地影, 哈, 我估我地都係因為慣左食多過睇景...我地仲係咁話, 呢D相, download 落黎就ok啦, 哈哈... 之後過左去南翔饅頭店食小籠包, 我地上一樓食, 原來佢越高食就越貴, 我地1/F食, 叫做麻麻地咁啦, 都好過地下欏住個外賣兜咁食既, 熱辣辣.... 及後我地過埋去城隍廟, 參觀之餘又拜下神咁囉, 都叫做有影下相, 再行下豫園四周圍, 我地就望開豫園準備過外灘觀光~ 點知想步行過去既時候佢落起雨上黎, 結果我地又兜多個圈, 之後先再行過去, 外灘我地都影左唔少相, 不過可能唔係夜晚啦, 我硬係覺得同維港無得比..., 香港靚好多, 再加上始終香港D文化同教育水平係高D, 上海想追香港?? 仲有一段好漫長既路~~, 哈! 行完外灘, 我地又行埋南京步行街, 上左uniqlo 買野, 駿駿上到黎上海竟然係買左兩pack襪, 之後又去左書城, 叫做嘆下冷氣抖一抖咁囉~ 之後諗住坐的士去食飯啦, 嘩, 頂佢....行左半粒鐘有多都截唔到的士, 結果搵到架貨VAN車我地去, 仲好, 平DD添~ 我地去左瑞金賓館既錦怡軒食飯, 原來個度個大廚係專整點心出名, 我地由肥偉發辦, 叫左好幾點特色小菜, 當然唔少得出名既花生穌同合桃穌, 味道好好, 我地影下相, 行下抖下, 食完飯就離開~ 我地再CALL番頭先架貨VAN, 車左我地去浦東既金茂君悅, 又係係咁易影下相啦, 影下東方肥珠塔, 就上左金茂87樓既酒吧, 九重天酒吧飲野~~~ 入面都幾 grand, 個VIEW亦都非常非常之正, 嚮全世界最高既酒吧飲野, 個感覺真係唔錯, 呢度每人有$120+15% 既 minimum charge, 但係我地每人都飲兩杯, 話咁快就到啦, 哈~ D野飲都幾特別, 我仲影左D cocktail 既 menu, 番到香港就學下點知...哈! 呢間野特別在有風水師同魔術師嚮度, 我估都係服侍D老外啦, 我地就唔會嚮度搵佢地黎玩!~ 可能今日大家都比較累, 飲野傾計到11點靚鐘就走, 因為我地都好早到, 其實都坐左好耐~ 結果就落番去坐的士番酒店沖涼訓覺準備第二日行程!

2006年7月13日 上海3日2夜之旅 Day 0

2006年7月13日 上海3日2夜之旅 Day 0 本身我地Book左聽日早上11:00正港龍航空前往上海遊玩兼探親~ 點不知駿駿夜晚先收到通知話班機Delay左11:50分先起飛... 我地即刻安排諗住改早班機, 因為太遲出發過到上海就會晏左, 唔係咁好.. 駿駿即刻打去港龍CS問, CS覆佢話只能夠當日早D到機場, 有位先有得check in. 我條氣唔順於是又打去問一次, 結果今次有個嬸嬸(把聲似, 但係唔知係咪), 佢又好好人咁幫我改哂D information落10:00班機度, 可以早少少過到去, 唔怕waste左D無謂時間! 攪埋機票我先開始執野, 係咁易執左少少放哂落個袋度 (我無拖喼), 就走去訓覺lu....(拗底起唔到身嘛)...

上海3日2夜之旅 (重點回顧)

2006-07-13 Day 0 航班延遲，改早航班成功 2006-07-14 Day 1 - 晨咁早起身出發 - 腸粉 + 麥精做早餐 - A22 - Check-in, 大家樂早餐 - 上機 - 飛機餐 - Haagen Das - 胡炳俾空姐串 - 落機 - 坐巴士落人民廣場再轉的士到酒店 - 屈我地$1500 Deposit, cheap trainee - 同肥仔會合 - 豫園 - 小籠包 - 城堭廟, 行街睇野(乜都無買) - 外灘觀光, 拍照, 談論上海與香港的競爭和比較 - 南京步行街 - 等的士 - 瑞金賓金 - 金茂君悅 - 九重天 - 番酒店訓覺 2006-07-15 Day 2 - 酒店早餐 (勁少野食) - 上海旅游集散中心 - 朱家角 - 全景點 - 坐船 - 走 - 百盛百貨 - 螢七人間 - 新天地 - 老第坊飲野 - 夜遊 - 宵夜 - 訓 2006-07-16 Day 3 - 頹早餐@酒店 - checkout - 振鼎雞 - 豐裕生煎飽 - 鐵皮玩具屋 - 坐的士炒車 - 酒店 - 南京步行街手信 - 小南國hea食+休息 - 磁浮列車 - 上機, 又改早左 - 抵港 - 玩完!

你快樂嗎??

快樂指數港遜越南內地 【東方日報專訊】全球快樂指數排名顯示，在一百七十八個國家或地區中，太平洋一個人口不足廿五萬的島嶼國瓦努阿圖位列榜首，是最快樂的國家。亞洲國家或地區中以越南排名最高，排第十二，內地排卅一，香港則排八十八。報告認為，人民快樂與否視乎國家有否尊重生態環境，與國家貧富無關。本港學者認為，香港受空氣污染影響，加上家庭與社區關係日差，港人不算快樂。 英國新經濟智庫NEF以人民生活滿意度、壽命及生態環境破壞程度，計算全球一百七十八個國家或地區的快樂指數。 瓦努阿圖居首 關係友善 排榜首的瓦努阿圖，人民壽命為六十八點六歲，但人民生活滿意度高達七點四分，其生態環境破壞程度僅一點一分，整體快樂指數高達六十八點二分；而排名最末是津巴布韋，快樂指數只有十六點六分。 瓦努阿圖當地傳媒認為，當地人民感到快樂，是因為他們並非消費導向的社會，很容易便心滿意足。人民生活在乎社區、家人和友善，不用煩惱太多，唯一憂慮是龍捲風或地震；瓦努阿圖人口少於廿五萬，極少生態環境遭破壞，人民合理地長壽及有很高的生活滿意度，可能與海岸線未受破壞及獨有雨林有關。 報告又顯示，國家富裕不等於人民快樂，八大工業國的人民均不太快樂，其中意大利的快樂指數在八大工業國中排名最高，排六十六，其次德國排名第八十一，日本排第九十五，近年因石油而暴富的俄羅斯則排名一百七十二。 亞洲國家或地區中，越南排名最高，排第十二，快樂指數達六十一點二；中國排名第卅一；香港排名第八十八，港人壽命為八十一點六歲，生活滿意度為六點六分，但生態環境破壞度達四點六分，快樂指數為四十二點九分，高於排名第一百卅一的新加坡。 生態破壞 抵銷物質快樂 報告認為，人民快樂與否跟國家是否成功無關，一些富有國家因生態環境受侵害，已抵銷任何物質上的快樂，但受貧困及疾病困擾的國家，人民生活滿意度亦相對較低，主要視乎國家有否尊重生態環境，為人民提供一個好的生活環境有關。 中大社會工作系助理授黃洪認為，港人生活屬高水平，但空氣污染嚴重，加上家庭與社區關係日差，港人生活是「有壓力、未解決」，故不算快樂。 ---------------------------------------------------------- so far 我自己黎講...., 只能夠話...暫時無乜唔開心野囉.... 開唔開心?? Okay 啦....哈~

感覺良好...

原來..., 我遇到一大堆我完全唔識, 或者識D唔識D既野嚮面前, 而又知道我黎緊要去學, 要去識, 甚至要去 master 佢.., 個感覺係咁興奮..! 好耐無試過呢種感覺..., 轉換下環境真係絕對無做錯... 先唔論我咁樣繼續做落去個$途有無其他途徑咁好, 但係學既野就一定有好多~~~ 感覺唔錯~~期待真正轉過去新 Dept 既一日!!

世界盃曲終人散~

施丹失控後的結果.... ---------------- 意大利贏得冠軍 ------------------------ 決賽終於都俾我估中番一次..., 之前Tip幾隊都係輸鬼左... 意大利好波!!!!! 簡拿華奴好波!!!!! 希望黎緊無波睇既呢一個月唔會太失落啦...~~ 不過屋企仍然 full of 零食&啤酒汽水~

幾時到我地....

匯豐九月增服務時間加人手 2006年7月6日 匯豐銀行9月起實施5天工作制，但部分分行服務時間每周增至七天，預料其他銀行會跟隨。 雖然匯豐銀行將實施五天工作制，但屬下114間分行，星期六將繼續營業，其中50間分行的服務時間將延長至下午4時半，但不會接受支票、自動轉賬和跨行轉賑服務，另外10間分行於星期日提供財富管理服務，營業時間由下午12時半廷至4時半，多集中在港島區，但不設櫃位服務。另外，由9月8日起，全線分行除離島外，服務時間由四時半廷至五時。 匯豐銀行發言人指出，為應付延長工作時間，需要增聘400名員工。 中銀香港表示，他們會考慮是否跟隨，若然跟隨，便要增加人手。恆生銀行副董事長柯清輝表示，延長分行服務時間成本一定會增加，不希望倉卒決定如何調整服務。廖創興銀行高級經理張南中說，中小型銀行跟隨調整服務機會很大。

是非之地...

令我想起劉德華及鄭秀文的 <孤男寡女>... 最慘係一件事傳出後會加鹽加醋, 將之醜化... 你老闆, 咁大個人咁既職位你仲要黎呢一套去攪個o靚, 我真係欣賞你... 剩係記得天下人負你, 你負天下人既就將佢忘記得一乾二淨.... 枉出面D人個個覺得你係好好先生, 你真係披著羊皮既豺狼呀! 請容許我講一句, 頂你個肺!

太Sad!?

呢排講黎講去D野都好似係 sad sad地咁...真係唔sad都攪到sad哂.. 係時候搵/諗番D開心D既野... 話說呢排個人好似settle down左DD之後, 真係好鬼好鬼好鬼死想去玩/學下其他野... 朋友仔們, 近排有咩玩麻煩大家預埋我, 忽然間覺得我D生活真係太枯燥, 係時候欏D顏色筆整番多少少色彩~~~ 希望遲D可以嚮中環番番工之後, 夜晚會多番少少世藝.... 如果唔係個人真係會老得好快... 我已經覺得自己好老..., 要快D玩番下先得!!! 仲有就係, 開始要搵番多D朋友仔食下飯飲下野, 保持番聯絡~ 否則我就會無哂D friend 底....哈 好, 努力!~