被串?

經過星期六晚同恒記同事既晚飯 + 精采既夜晚, 及星期日既休息... 今日番工竟然俾其中一個大客串親!!~ 呢個大客其實都係o岩o岩識, 見過一次面其實都知佢麻Q煩.., 不過都係怪我之前無做足功課, 上到去UP UP下事旦講左D rate 既 range 出黎, 竟然俾佢大番轉頭話我一定知度係 above 呢個 rate, 叫我之前去做番好D homework先 (竟然仲要用英文... !_!) , 實在太可惡~~~ 雖然其實我同事話個客都只係擺番個老細款出黎, 認真, straight forward 個隻, 不過我自己又真係衰無做好preparation既 (唉...星期一魂魄都未番...)... 不過都好, 呢排個人做野做得hea得滯, 呢一野正好警惕番我要認真番少少....唔好太hea.., 哈哈!~ 放心, 呢個客, 我絕對有能本事捉到佢實一實, 睇住黎, 嘿嘿!!~

不負責任預測 again...

今日適逢匯豐宣佈 Mortgage 利息減至 P-2.75 (今日為 5厘), 又被兄長提及建行日日係咁升... 小弟又在此做個不負責任預測先..... 1. 一至三個月內, 樓價回落 2. 建行即將回落至3.35附近, 及後再上~ 3. 銀行及地產股逐漸回落 呢一刻, 小弟係淡友, 哈 : )

有意思~有意思!

送給我身邊的一些朋友~

與及某些時間的我自己!~

Eason 演唱會

11/2 去左睇EASON演唱會~ 全場感覺係舞台設計好有心思, 有心思到其實我唔係好明, 哈... EASON今次繼拉闊後玩多左舞蹈, 亦見到D舞蹈係排得有意思既~ 例如唱大空漫遊時既舞蹈~ 再唱 "傷信", 其中一個全場既高潮~ 太早完, 11:15左右就完, 不過佢當日唔舒服, 無法~ 多謝各方好友既陪同, 下次再有機會同大家睇我會早D買飛 : )

怕怕....唔好壞呀!

還記得以前久唔久就會嫌部電腦行得慢, 索性諗都唔諗重裝windows去tune番快部機~ 之後慢慢install番D常用既 software, 執頭執尾, set 番好自己習慣既 shortcut, 之後煥然一新, 好似新電腦一樣, 享受著速度感.. 不過...自從出左黎做野, 換左電腦之後, 我發現....原來我兩年幾無試過再做呢個傻事.... 今晚番屋企開電腦, 竟然入唔到windows, 話叫我搵番個boot device出黎, 然之後先用到云云... 嘩我頂.., 當時我心諗, "保你大呀, 你咪壞呀" , 我真係付出唔起個 Time cost 同精神去裝過個 windows 入番哂所有野... 心急之後我起碼 reboot左5-6次, 重新開過機2-3次... 結果都係一樣..~ 好彩自問由細玩電腦玩大, 忽然間諗起可能係Bios問題, 我即刻入去睇睇, 望左陣, 諗左諗, 發現左個問題 ~~ (原來佢個boot sequence錯左, 但係唔知點解會忽然錯左 =_=), 焦急既我竟然改番正之後即刻又出番去啦~... 點知結果一樣啦, 我拗哂底....., 之後決定無理佢, 走鬼左去攪第二D野一陣... 再番黎, 入BIOS睇, 先發現自己頭先原來無 save......嘩, 都唔知仲乜叉事會咁... 我拿拿臨執番正, 終於....俾我見番windows xp個畫面.., 我心情先冷靜番落黎... 今次經驗...真係頂一聲...~ 唉, 而家真係唔識玩電腦...好鬼怕佢有事... 事關而家夜晚無左部機, 真係爭好遠.....~ 保你大....千奇咪再攪鬼我呀~ 我受唔起打擊.....: ) 亦都請大家留意....我已經唔再係IT人.....唉~

社會大學高材生?

近排身邊D朋友仔俾左好多例子我話要搵到$$$做到高層, 讀書真係唔係最重要.. 經常聲稱佢老細都係中五畢業only 云云... 其實, 我自己某程度上都好鬼認同, 之前聽鄒凱光嚮電台節目提到, 做人處事講三面~ 1. 人面 2. 情面 3. 場面 人面, 對工作非常重要, 出到黎做野就會發現, 你識得人多, 唔駛一定要熟都會發現好有幫助.. 情面, 人地肯賣人情俾你, 做野都會 straight forward D, 唔駛轉彎抹角, 又係重要 場面, 我唔係好記得點解, 可能係講緊天時同地利~ 可能, 識得處理呢三面, 先係社會大學既高材生~~ 要積極去學好呢三樣野!~

個人炒股守則 version 1.0

1. 大跌+成交量增加, 唔買 2. MA 逆排, 唔買 3. 窩輪, 唔買 4. 無經分析或者無原因既, 唔買 5. 溝上, 唔溝落 遲下再有先再加上去~

開場白

今日同朋友食TEA, 傾開見到朋友既開場白既問題., 我好自然咁話, 多數見面都係會話 "點呀, 近排你點呀?".... 結果佢就話我好鬼死Default., 之後, 我真係R哂頭, 其實大家見到D唔會成日見既朋友, 一開波會講咩呢?? 有無D意見比下我..?

Chaser

你幾時番黎呀..... 發現無左你, 星期五六夜晚真係悶左好多... 琴晚去完LKF, 完全係兩回事~ 始終都係你好D... 好掛住你~ 希望你五月真係會番黎啦~~~ 哈!~

Chaser

你幾時番黎呀..... 發現無左你, 星期五六夜晚真係悶左好多... 琴晚去完LKF, 完全係兩回事~ 始終都係你好D... 好掛住你~ 希望你五月真係會番黎啦~~~ 哈!~

新春首仗報捷!!~

雞狗二年之間, 屋企黎左一場轟烈既四方城大戰~ 側聞肖蛇者於狗年財運亨通, 命運安排兩位肖蛇者對坐, 其餘挑戰者分別肖雞及肖牛~ 結果, 四回合過後...... 肖蛇二人大敗而回~ 肖牛者取得凱旋而歸~ 肖雞者(小弟)則小嚐甜頭~~ 期待下次再戰~ 多謝多謝~ 另在次恭祝各位狗年身體健康, 橫財就手, 生意興隆, 步步高陞, 學業進步, 心想事成, 事事順利~ 恭喜恭喜!!!

朋友的選擇 --- 669創科實業

669 創科實業 單單看圖, 我相信我的朋友是在前一個交易日大跌巿中入貨的... 不過...., MA 全部逆排, 成交上升股價下跌, 各種利淡因素集而一身... 結果..., 今朝開巿前宣佈停牌..., 涉公佈股價敏感消息..... 至少, 我會相信有其他更佳的選擇..... 希望我的朋友好運, 希望我睇錯~~~

誘惑...

原來外間既誘惑真係好犀利, 真係搞到我呢排個人一得閒諗野就會諗番起... 機會原來真係大把, 個巿原來真係好好景~ 不過都係Jaa 爺講得o岩既, 後生仔, 捱下先啦, 唔好成日諗住轉!!!!! 但係, 不論公司名/人工, 都好吸引 : ) 雖然呢度又有佢值得留戀既地方!~ 哈哈, 真係難決擇...~

I Love you, KOBE the 81!

Kobe Bryant 個人獨取 81 分! 帶領湖人於23/1/2006以122-104戰勝速龍.. 創造歷史性紀綠~ Are you serious?? Yes, I am serious!! 你話我獨食?? 我獨食得起!! I Love this game!!

巿道好轉??

有無咁Q多人呀.., 前日琴日一連兩日都光顧左有番咁上下規模既酒樓食飯~ 嘩, 人多到呢, BOOK左位都唔代表你一黎到就有位, 起碼要你等番半個鐘先至安排到你坐低, 再加上等候大堂D人密到插針都插唔入, 老實講, 係咪過份左少少呀....? 兩次都係一早就訂左個套餐, 一坐低就即刻同你上兩碟菜, 好似要快快上哂D菜趕你走再做下一輪咁, 我心諗, 我地八點幾先至開波食, 你係咪仲趕得切做多一輪生意呀?? 真係一個唔係咁好既經歷, 我實在太唔鐘意一班人食飯要趕頭趕命, 好似打仗咁.... 不過.., 見到咁既場面, 係咪真係意味住經濟巿道好轉?? 如果係真既, 消費上面會唔會唔再慳住慳住, 而係大手交易?? 如果真係咁, 香港可能真係會再好多三五七年.. 零六年, 會唔會真係咁好呢..?? 我既零六零七預言唔知會唔會出現呢...

出外靠朋友

邊個話無直版銀紙換? 你識朋友就幫到你~ 邊個話Mort Loan個利息貴? 你識朋友就幫到你~ 邊個話定期利息低? 你識朋友就幫到你~ 邊個話無生意要愁? 你識朋友就幫到你~ 份件唔識做點算? 你識朋友就幫到你~ 朋友多~ 真係好好多!! 多謝各位幫過我既人 : )

Kick Off

Unofficial Kick Off 左... 開波要做野, 原來真係會有壓力~ D同事都傻傻地既~ 睇黎我都係時候做番D野!~ 如果唔係, 下年我又會嚮另一間公司架啦~~~

反思 - 跳出框框

今朝一早睇完原是物語, 有以下感想... 文中提及孔少林中學時的美術老師常常指導他們要打破傳統, 天馬行空, 他們參加美術比賽時做了一尾大金魚, 而魚尾飛出框外, 最後憑這個『跳出框框』的意念得到了全港冠軍... 睇完全文即時令我想到上星期同同事傾開佢仔女讀書既問題, 我地異口同聲地同意, 經過香港教育制度既洗禮後, 都認為如果有錢, 一定送自己子女去外國讀書... 究竟係咩原因令到我地對香港教育咁無信心? 定係外國月亮硬係圓D? 我只係覺得嚮香港讀書, 你永遠就係不停吸收, 永遠將老師同書本講既野照吸, 當中極少加上思考, 變左你話乜我信乜, 只要信就不要怕.., 每個學生就不停將自己當做機器咁讀書..., 好啦, 唔讀書就被標籤為壞學生, 無前(錢)途等等.. 結果就做成好多只係識讀書既書獃子, 非書本上的免問.. 又有另外一批比較醒目既會順住要求去做, 我地稱為 "exam-oriented" 為考試而讀書, 考完可以話係99%唔記得, 讀完, 又係唔知做乜... 嚮我地經歷呢D階段後, 對香港教育都怕怕... 而且而家學生入學講求 "乜都識", 美術音樂舞蹈跆拳空手足球游水棋藝演講天文地理科學政治經濟最好樣樣都識, 一方面造就不少學童教育公司, 一方面卻苦了小朋友.. 又見到有D家長唔俾子女睇電視, 慌死個仔學壞, 叫個仔去讀古文, 四大名著等等, 到到我地呢個年紀, 一定會俾人問 "你個童年去左邊??", 到時個仔女先識得後悔... 如果仔女真係鐘意都還可以, 如果唔鐘意, 第時就只會埋怨父母無同佢地安排最適當既野... 或者.., 還小朋友一些自由可以嗎?? 俾佢地有自己既想法, 等佢地破舊立新, 跳出框框, 可以嗎??

成功踩車

正所謂天有不測之風雲, 我地呢個 IESoc&Fans同學會不下數次嘗試攪踩車活動都撞著落雨甚至打風而令活動改期, 嚮一改再改之後, 琴日終於成功完成到我地呢個踩車會!! 節目嚮朝早開始 (其實已經12:30) , 我地先去飲個早茶, 都係每次必有既節目之一, 去左新城巿隔離間酒店下面間麗都, 食飯黎講無乜特別, 只係大家都好有避忌唔敢講落雨之說~~~ 食飽飽, 大家再確認天氣都應該無乜問題, 之後就去左租車, $50蚊一日, 叫做OK啦, 可惜無得嚮大埔還車, 爭少少方便~ 大家揀o岩車, 試下行下又兜下圈, 等齊人就出發~ 好彩無耐之前嚮Josephine屋企踩過下, 今日再踩都無話唔識平衡, 總算唔太失禮啦, 不過開頭都唔可以玩單手, 踩踩下先可以講住電話踩~~ 我地順住條路踩入大埔, 我估可能因為今日天氣都幾好, 成條路都好很多人, anyway 熱鬥D都OK既, 個半鐘多D, 就踩到入海濱公園~~ 嚮公園旁邊主要都係睇下人地放下風箏, 我地又做埋每個旅程必要做既野 (影相), 之後hea多陣都回程... 回程就頂囉~~ 俾阿A君打黎吹左陣水, 攪到我行錯路, 兜左個圈, 仲要問人人地又帶錯我行, 行番正路已經唔見哂佢地, 唯有出盡力踩..., 臨尾真係累到踩唔郁咁滯!!~ 踩到半路都係去番間船士多食魚旦飲綠力, OK啦, 可能累到食乜都無所謂, 食左少少抖左陣就捱埋回程條路.. 之後當然就係搵野食, 估唔到6:30 成個新城巿所有餐廳都要等位, 真係啤一聲~~ 結果ALEX搵左間新開既餐廳, 嚮大家都無所謂既程況底下照入去坐, 俾左個U形卡位, 都叫舒服既, 見餐牌野食又唔係太貴, 開始亂叫, 點知.... 絕對叫做有驚喜, D野食基本上黎講真係唔錯, 雖然有少少可能因為太累, 變到食乜都無所謂, 但係, 整體上都叫幾好!!~ (新到openrice都未有link, copy唔到.., 間野叫紅葉 Maple, 嚮好運中心舊好運葡國餐廳)~~~ 食飽, 吹水, 之後就頂唔順番屋企, 睇埋勁歌再睇車仔就訓lu~~ 總括今次旅程的確唔錯, 不過可能太耐無做運動...削左 =_=

溝通能力

出黎做野, 真係覺得溝通能力對一個人成唔成功真係影響好大... 我身邊有D同事我個人黎講其實都覺得佢係好有料, 可惜就真係衰在表達能力差, 溝通能力又有問題, 變左好多時佢想講既野根本表達唔到俾其他人知, 就算話想教人做一D野, 都攪到將D問題復雜化, 實在係好大問題!! 幸好我對自己既表達能力同溝通能力都尚算滿意.., 當然未去到演講級, 但係至少So far 我想表達既野人地都知人地都明... 說話能力.., 絕對係我畢業後其中一樣我自己好想去 Improve 既野.., 實在對做Sales, 甚至做人同與人相處有一個好大既作用!!